O PP saíu este sábado ao paso das críticas realizadas polos alcaldes socialistas da Mariña Lucense, que acusaron á Xunta de “manter á marxe” á bisbarra dos investimentos da Xunta de Galicia, e aseguraron que “o Goberno de Feijóo é o que máis inviste na comarca”. Así o manifestaron os candidatos do Partido Popular por Lugo ao Parlamento galego, José Manuel Balseiro e Daniel Vega, durante o reparto que levaron a cabo xunto ao edil José Manuel Lamela no mercado do Valadouro do xornal elaborado polo partido conservador de cara ás eleccións autonómicas.
Os populares falaron da “ampliación do Hospital da Costa, as obras do segundo martelo do porto de Burela -en execución e cun investimento dun millón de euros- ou a remodelación integral da nave de redes, licitada por 287.000 euros” para exemplificar a achega da Xunta. Afirmaron que a dragaxe dos portos de Celeiro-Viveiro e Ribadeo iniciaranse “cando as condicións meteorolóxicas o permitan”.
En materia de desenvolvemento industrial, “a Xunta de Galicia é a única administración que está apostando polo solo industrial na comarca”, segundo manifestaron os candidatos do PP. “A administración autonómica está a aplicar bonificacións do 50% sobre o prezo de compra das parcelas e achegando facilidades para o alugueiro do solo industrial nos polígonos da súa competencia”, explicaron.
No tocante ao sector forestal, os dirixentes populares remarcaron que a bisbarra “é unha potencia galega e, como tal, é a máis beneficiada polos apoios do Goberno galego ao sector”, segundo manifestan os conservadores, que se dirixen á compra de maquinaria, á limpeza de fincas forestais ou, incluso, á posta en marcha de distintas iniciativas relacionadas co aproveitamento madeireiro”.
ALCOA
Vega e Balseiro afirmaron finalente que os socialistas “néganse a falar do principal problema da Mariña, a crise de emprego en Alcoa provocada por unha decisión inxusta e unilateral do PSOE”. A cabeza de lista dos socialistas de Lugo ao Parlamento (Patricia Otero) “non só non di nada ao respecto, senón que apoia a decisión do Goberno de Pedro Sánchez”.