InicioM.ambiente e PatrimonioO castro da Trinidade pasou de dúas hectáreas a vinte metros pola...

O castro da Trinidade pasou de dúas hectáreas a vinte metros pola acción da canteira

Mariña Patrimonio e ADEGA, que confían en que prospere o procedemento penal iniciado coa denuncia ante a Fiscalía, demandan a paralización inmediata da actividade

Publicada o

- Advertisement -

As dúas hectáreas do castro do Monte da Trinidade, en Mondoñedo, quedaron reducidas a apenas vinte metros. Mariña Patrimonio puxo en cifras os danos causados no xacemento arqueolóxico por unha canteira que, denuncian, segue en funcionamento.

Como adiantara Galicia Confidencial, o colectivo mariñao e ADEGA denunciaron ante a Fiscalía a destrución do castro, inventariado e catalogado nos PXOM de Mondoñedo e Lourenzá. As entidades consideran que o contido da documentación recopilada e remitida ao ministerio público acredita que a Dirección Xeral de Patrimonio incumpriu o seu deber legal de protexer o xacemento malia ter constancia de varias denuncias que advertían da situación desde 2008.

SEGUE A ACTIVIDADE

Entre as irregularidades denunciadas, figura o cambio de actividade da canteira que, malia contar con autorización para  pedra ornamental, contruíu na zona unha nave na que produce formigón a partir do material calizo extraído. “Na documentación que temos non consta que se autorizase ese cambio”, apunta Manuel Miranda que incide na urxencia de paralizar a actividade da empresa.

O voceiro de Mariña Patrimonio incide no despropósito de que continúe en funcionamento despois da destrución causada no xacemento e da acumulación de irregularidades rexistradas en materia patrimonial pero tamén ambiental e urbanística.

“A canteira tiñan que paralizala xa. Aínda que o xacemento case desaparecese, a protección segue. Doutra maneira sería un precedente nefasto”, subliñou Manuel Miranda.

 

Montserrat Calvo, Froilán Pallín e Manuel Miranda na comparecencia deste martes en Lugo. AXM

PROCEDEMENTO PENAL

Mariña Patrimonio e ADEGA consideran que os indicios que recolleron en relación coa actuación de Patrimonio poderían ser constitutivos de delitos de prevaricación, falsidade de documentación e danos contra o patrimonio histórico e natural.

“É o caso máis grave e escandoloso ao que nos enfrontamos en anos pola evidencia da documentación que recollemos e pola transcendencia dos danos causados”, explicou Froilán Pallín, voceiro de Adega. “Sorpréndenos a insensatez e a irresponsabilidade coa que se actuou neste caso”, engadiu en referencia ao papel do Servizo de Patrimonio Cultural de Lugo no proceso.

SERVIZO PROVINCIAL

Na denuncia expoñen que, en 2016, o departamento elaborou un informe no que negaban á existencia co xacemento co obxectivo de quitarlle a zona a protección que lle correspondía e legalizar así as actuacións  que a empresa viñera facendo sobre o xacemento. Na denuncia adxúntase unha comunicación remitada polo servizo provincial ao Concello de Mondoñedo na que se recomenda a exclusión do castro do PXOM, daquela en fase de tramitación.

Aínda que a recomendación non se transladou ao documental municipal que si protexe o xacemento, os denunciantes apuntan que si puido ter consecuencias en autorizacións emitidas por outros departamentos e que mesmo pode amparar a empresa en actuacións futuras.

HERMETISMO

Mariña Patrimonio e Adega incidiron no “hermetismo” co que se atoparon por parte da administración durante os tres anos nos que levan traballando na recollida da documentación, e que os levou a recurrir ao Valedor do Pobo. “Incluso a través desta institución tardamos dous anos en recibir unha documentación que deberíamos ter nun mes”, apunta Manuel Miranda.

Co castro practicamente destruído, os denunciantes agardan que o procedemento sirva como un “toque de atención” e que redunde nunha maior dilixencia e coidado no cumprimento das obrigacións de portección por parte do servizo de patrimonio. “Cremos que este procedemento pode marcar un antes e un despois neste sentido”, augurou Pallín.

FISCALÍA

O caso quedou o pasado setembro nas mans da Fiscalía que, segundo explicou a avogada Montserrat Calvo, terá que investigar a documentación en profundidade para calificar os feitos e determinar se presenta a correspondente denuncia diante do Xulgado de Instrución de Mondoñedo. “Colaboraremos coa Fiscalía en todo o que nos requira e, se o procedemento prospera, persoarémonos como acusación particular”, concluíu.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...