Os traballadores de Alcoa en San Cibrao cortaron a estrada principal de acceso á fábrica, a cuxas portas se concentran a partir das 11,00 horas á espera do que decida o Tribunal Supremo sobre o expediente de regulación de emprego (ERE) na planta.
E é que os maxistrados da sala do social do Supremo debaten este mércores sobre o recurso que interpuxo a multinacional do aluminio contra a anulación do ERE para máis de 500 traballadores que pretendía aplicar na factoría da Mariña.
Coincidindo con esta reunión, e coa previsión de que haxa pronunciamento este mesmo mércores, o persoal, que continúa en folga indefinida, convocou senllas concentracións, ás 11,00 e ás 20,00 horas.
Á marxe da decisión xudicial, que esperan que ratifique a anulación do ERE por parte do Tribunal Superior de Xustiza de Galicia (TSXG), os traballadores seguen esixindo unha intervención temporal da planta coa vista posta no seu traspaso a un terceiro.
Pola súa banda, a empresa, que recorreu a anulación do ERE, mantén o seu compromiso de vender pero condiciona a operación a que o Goberno central estableza un marco enerxético competitivo, cun prezo da luz máis baixo.