O Programa Integrado de Emprego (PIE) ‘Avanza na Mariña Lucense II‘, impulsado pola Mancomunidade de Municipios e financiado pola Xunta de Galicia, está en marcha.
Un total de 100 persoas desempregadas benefícianse dun proxecto que aspira a impulsar a súa inserción no mercado de traballo.
Os participantes, que proceden de Alfoz, Barreiros, Burela, Foz, A Pontenova, Riotorto, O Valadouro, O Vicedo e Viveiro, son principalmente menores de 30 e maiores de 45 anos.
Entre os beneficiarios do plan atópanse persoas con discapacidade ou en risco de exclusión social, parados de longa duración e mulleres vítimas de violencia de xénero.
ADAPTADO Á DEMANDA EMPRESARIAL
A través do ‘Avanza na Mariña Lucense II’, os alumnos e alumnas están a recibir formación específica nos sectores agrario e de servizos, os dous campos con máis saídas laborais da comarca, xa que os programas integrados de emprego están adaptados á demanda das empresas da contorna.
En concreto, estase a impartir cualificación en operacións básicas de restaurante, agricultura ecolóxica, instalación e mantemento de xardíns e zonas verdes, auxiliar en conservación e mellora de montes e en atención sociosanitaria a persoas dependentes en institucións sociais.
Así mesmo, ofrécese formación transversal en novas tecnoloxías, técnicas de busca de emprego, técnicas de coaching, inglés, galego, carné de manipulador de alimentos e obradoiros sobre emprendemento, entre outros.
Dos cen participantes, o 35% terá unha oportunidade laboral cun emprego temporal ao rematar o proxecto.
FINANCIAMENTO
A petición da Mancomunidade de Municipios da Mariña, a Xunta financia integramente este plan, que conta cun orzamento de 250.000 euros. O director xeral de Orientación e Promoción Laboral, Alfonso Marnotes, visitou en Foz ao alumnado acompañado do presidente do colectivo de municipios, Alfredo Llano, e do alcalde focego, Javier Castiñeira.