A Mariña rexistra os refachos máis fortes deste novo temporal en Galicia

Este venres documentáronse ventos de 133,8 qm/h en Viveiro e de case 100 en Burela

Un home ve como o vento dobra o seu paraugas / EFE

O forte vento rexistrado nas primeiras horas deste venres deixou refachos significativos de 133,8 quilómetros por hora no municipio costeiro de Viveiro e de 116,3 no de Cedeira.

Así consta nos rexistros de Meteogalicia ata as 9.15 horas que reflicten que as localidades con altitude menor de 900 metros son as que rexistraron os refachos de vento máis significativas.

Na provincia de Pontevedra o vento alcanzou os 109 quilómetros por hora en Cuntis; tamén destacans o 102,8 qm/h en Vimianzo (A Coruña) e os 98,4 de Burela. En localidades de montaña, o vento deixou refachos máximos de 101,5 quilómetros por hora en Cervantes (Lugo); 92,8 na Veiga (Ourense); e 87 qm/h en Navia de Suarna (Lugo).

ALERTA LARANXA POR TEMPORAL COSTEIRO

Perante a situación meteorolóxica, a Xunta de Galicia activou a alerta laranxa por temporal costeiro nas provincias da Coruña e Lugo.

Segundo informou Vicepresidencia nun comunicado, a Axencia Estatal de Meteoroloxía (AEMET) avisa de que o fenómeno meteorolóxico adverso costeiro afectará o noroeste da provincia da Coruña e a todo o litoral de Lugo a partir das 15.00 horas con ventos de forza oito e mar combinado do noroeste con ondas de entre cinco e seis metros.

Debido ao temporal costeiro a Xunta recomenda permanecer lonxe da liña de costa e das praias e paseos marítimos co fin de previr un eventual golpe de mar que poida arrastrar persoas ou obxectos.

Tamén aconsella a suspensión das actividades pesqueiras e marisqueiras como medida preventiva naquelas zonas máis perigosas, así como extremar as medidas de seguridade á hora de realizar calquera actividade no mar e revisar os cabos e amarres das embarcacións.

RESPOSTAR

Please enter your comment!
Please enter your name here