As obras de mellora do peche perimetral do campo da Marosa remataron a súa 2ª fase das obras de mellora do peche perimetral do campo de fútbol de herba artificial da Marosa, que supuxo un investimento de máis de 35.000 euros.
O concelleiro de Deportes, Ramiro Fernández, explicou que se cambiou o peche dos fondos sur e este, porque estaba moi deteriorado, procedeuse á mellora da canalización das augas pluviais e da accesibilidade aos baños e cambiáronse os banquillos. Fernández Rey e o alcalde, Alfredo Llano, supervisaron os traballos e destacaron que se trata dunhas obras que eran moi demandadas.
O edil burelés subliñou que “é unha moi solicitada polos usuarios do campo e necesaria basicamente por temas de seguridade. Esta era a segunda fase desta obra, que consistía no peche perimetral do campo de fútbol de herba artificial”. Durante a primeira fase arranxáranse os lados norte e oeste, financiado con fondos municipais. Para esta segunda parte o concello recibiu unha axuda da Deputación Provincial de Lugo.
Fernández Rey dixo que “estaba en mal estado e era unha reclamación que nos viñan facendo desde a Sociedade Deportiva Burela e desde Porto de Burela, que son os usuarios das instalacións”. O concelleiro remarcou que esta parte do campo é unha zona onde pega o salitre do mar complicando o mantemento dos materiais. Para Ramiro Fernández “isto é unha mostra máis da aposta que fai este Concello, especialmente desde a Área de Deportes e tamén o alcalde, que está volcado co tema deportivo, polas instalacións municipais”.
Fernández contou que “con esta obra tamén houbo algún problema cos materiais, polo que se retrasou e tivemos que pedir unha prórroga á Deputación para poder realizala en prazo e forma”, debido á crise de fornecemento de material.
