A Plataforma Sanitaria da Mariña denunciou este venres que as urxencias no hospital de Burela atópanse “colapsadas” desde hai varios días. A portavoz desta plataforma, Montse Porteiro, vinculou o “caos” que se revive nas urxencias no Hospital da Mariña aos “problemas” que sofre a Atención Primaria na comarca.

“As urxencias no hospital de Burela están colapsadas e eu sempre remarco que a Atención Primaria é a base do sistema sanitario”, avisou. Porteiro insistiu en que “a primaria é o sistema que se atopa máis próximo aos veciños e se cae Atención Primaria se desmorona o seguinte nivel”.

“Isto é como un castelo de naipes e si lle dás un golpe á base vai caer todo“, comparou. Ademais, incidiu en que a Atención Primaria está “a sufrir un colapso importantísimo porque faltan profesionais, falta material e falta orzamento”. “Tamén os problemas no hospital repercuten sobre a atención primaria. O sistema sanitario sexa cal for o nivel retroaliméntase mutuamente”, advertiu.

A Plataforma Sanitaria da Mariña levará a súa oficina de queixas o vindeiro mércores ao hospital de Burela. En principio esta acción facíase coincidir cun martes, pero trasládase ao mércores por ser festivo o 1 de marzo polo Entroido.