Os problemas de néboa no Alto do Fiouco, en Mondoñedo, non paran. Non hai semana na que non haxa incidencia. Os enxeñeiros que deseñaron a Autovía do Cantábrico non contaron cun fenómeno atmosférico milenario e iso, a pesar de que algún veciño xa advertiu da tolería que supuña esa infraestrutura.

Por iso, semana si e semana tamén non hai día na que  non haxa problemas coa néboa. Esta semana xa son cinco os días consecutivos con dificultades, os últimos dous, con ese tramo cortado. Aínda que unha leve melloría das condicións permitiu a apertura á primeira hora da mañá da autovía do Cantábrico (A8), os densos bancos de néboa que dificultan a visibilidade e condicionan a seguridade dos propios usuarios obrigaron a cortar novamente a circulación.

Segundo a información facilitada pola Dirección Xeral de Tráfico (DXT), a autovía quedou cortada de novo esta mañá -ás 10:14 horas- en ambos os sentidos da circulación, concretamente no tramo comprendido entre os quilómetros 536 e 552, o que coincide co Alto do Fiouco.

Previamente, os tres primeiros días desta semana, a autovía estivo con limitacións de velocidade como consecuencia da néboa -os vehículos tiñan que circular a menos de 60 quilómetros por hora-. Como é habitual, os condutores que circulan pola autovía son avisados mediante a correspondente sinalización e os paneis luminosos desa circunstancia.

CIRCULACIÓN DESVIADA

A circulación foi desviada pola estrada Nacional 634, cuxo arranxo volvía reclamar esta semana o municipio de Mondoñedo, a causa do mal estado no que se atopa o firme e a deficiente sinalización.

Os problemas coa néboa nese punto da Autovía do Cantábrico son recorrentes e, de feito, está en marcha un proxecto de Ministerio de Transportes, Mobilidade e Axenda Urbana para a instalación de prototipos sobre o terreo que permitan avanzar en solucións alternativas para superar esta situación.