A asociación Tá en Artes deu a coñecer este mércores a súa programación cultural ao longo deste 2019, na que se homenaxeará ao ilustrador ribadense Suso Peña, considerado por moitos o primeiro galego que se dedicou de xeito profesional á banda deseñada galega.
Deste xeito, a banda deseñada -ou cómic– e a figura do artista mariñao protagonizarán os actos.
Nado en Ribadeo no 1941, Peña formou parte do Grupo La Floresta, na Barcelona de finais dos anos 60, xunto a Carlos Giménez, Adolfo Usero, Esteban Maroto ou Luis Gasca.
Por 25 anos traballou para axencias de banda deseñada de ciencia ficción e aventuras e os seus traballos publicáronse en Europa e en América. Tamén se dedicou á docencia e á fotografía. Faleceu no ano 2005.
NOMEAMENTO
En marzo, o pleno de Ribadeo debaterá a proposta de Tá en Artes de nomear a Peña a título póstumo como Fillo Predilecto de Ribadeo, unha causa que involucrou ata a 17 asociacións ribadenses, segundo precisou a directiva de Tá en Artes.
MOSTRAS
O 13 de abril, Tá en Artes inaugurará unha exposición sobre o ilustrador no seu Ribadeo natal, na que se espera que participen amigos e alumnado dos lugares onde impartiu docencia.
A agrupación impulsará outra mostra no Cenima de Foz entre o 17 de abril e o 17 de maio, na que se buscará tender pontes entre artistas da Mariña Lucense e doutras latitudes.
MACROEXPOSICIÓN
Finalmente, a agrupación traballa nunha exhibición a grande escala sobre a banda deseñada, que podería verse na Mariña a finais deste ano. O colectivo busca financiamento para poder levala a cabo.
o colectivo buscará financiamento para realizar unha exposición de banda deseñada a gran escala a finais de ano
No pasado ano, Tá en Artes homenaxeou ao artista valenciano e afincado en Mondoñedo Juan Puchades Quilis. O 2019 será o ano de Peña e a agrupación ten a intención de, alomenos nos dous próximos exercicios, seguir dando a coñecer a obra dun artista mariñao ao longo do cada curso.
PRIMEIRA REVISTA ESCOLAR DE ARTE
A asociación cultural radicada en Foz presentou tamén a que é a primeira revista escolar sobre arte, que recolle traballos de alumnado de primaria, infantil e secundaria de doce centros educativos da Mariña Lucense.
O alumnado dos centros escolares realizou obras ao longo do curso 2017-2018, que se expuxeron no mes de xuño do 2018 no Cenima. O Concello de Mondoñedo propuxo o primeiro Premio Puchades á creación artística escolar.
TÁ EN ARTES PRESENTOU A PRIMEIRA PUBLICACIÓN DE ARTE FEITA POR E PARA O ALUMNADO
A iniciativa contou co apoio da Secretaría Xeral de Política Lingüística. O colectivo repartirá 250 exemplares entre os centros educativos da bisbarra.
Tá en Artes aspira a que a revista teña carácter anual e que se edite a principio de cada ano escolar. Pretende que conte non só co traballo realizado e exposto o ano anterior polo alumnado e profesorado, senón ademais coa colaboración de distintos creadores que expoñan ideas para traballar na aula.
