A organización do Resurrection Fest mostrou na noite deste martes o primeiro anuncio oficial da vindeira edición, a décimo quinta, do festival de rock duro, que se celebrará en Viveiro do 1 ao 4 de xullo do 2020.

No anuncio, titulado ‘15 years of burning passion‘ (15 anos de ardente paixón), tras forxar unha peza de metal, o protagonista le unha enigmática nota que semella dicir: “Father, in your hands I commend my spirit‘ (“pai, nas túas mans encomendo o meu espírito”).

Boa parte dos seguidores do Resu interpretaron esta escena e esta popular cita da Biblia como unha chiscadela a unha posible actuación de System of a Down, grupo que se conta entre os máis desexados polos seareiros do festival -nunca actuou no recinto de Lavandeiras– e que ten unha canción, ‘Chop Suey‘, que inclúe ese mesmo verso.

ACTUARÁN EN FINLANDIA O 25

Segundo revistas musicais especializadas no rock, a banda confirmou unha primeira actuación en Europa o 25 de xuño, en Finlandia. Por agora, a organización do Resurrection Fest non adiantou ningún concerto, de xeito que as cábalas dos afeccionados mantivéronse ao longo de toda a noite do martes.

O XOVES, PRIMEIRAS CONFIRMACIÓNS

A organización anunciará este xoves a primeira das bandas que exercerá como cabeza de cartel na vindeira edición do festival.