O cervense Xaime Miranda gañou o galardón ao mellor videoclip da décimo oitava edición dos Premios Mestre Mateo. O realizador mariñao acadou este recoñecemento por ‘Esquimales‘, peza audiovisual realizada para o grupo de rock Heredeiros da Crus.
A dirección, produción e montaxe correu a cargo de Miranda, que contou cun equipo plagado de xente da Mariña Lucense, como Iago Vilariño (director de fotografía) ou Sabela Blanco (axudante de produción), e tamén utilizou localizacións da bisbarra, como é habitual nas súas premiadas pezas.
‘O QUE ARDE’, TRIUNFADORA
A película ‘O que arde‘ foi a gran triunfadora da gala do audiovisual galego ao gañar seis galardóns dos doce aos que optaba, entre os que recibiu o recoñecemento á mellor longametraxe e á mellor dirección para Óliver Laxe.
‘O que arde’, producida por Miramemira, 4A4, Kowalski Films e Tarántula, foi a máis recoñecida nunha gala celebrada no coruñés Palacio da Ópera, onde o seu director, Óliver Laxe, evocou o bo clima da rodaxe agradecendo aos productores e aos actores “esta aventura”: “¡Crecemos tanto facendo isto!”.
Para esta cinta que reflexiona sobre os incendios forestais súmanse os galardóns de mellor dirección de arte de Samuel Lema e Curru Garabal, dirección de fotografía de Mauro Herce, montaxe de Cristóbal Fernández, e son de David Machado, Amanda Villavieja, Sergio Silva e Xavi Souto.
A segunda triunfadora da noite foi a serie ‘Ferro‘, de Portocabo, Movistar, Arte France e Atlantique Productions, con catro galardóns, o de mellor serie de televisión, mellor dirección de produción para Ana Míguez, mellor guión para Pepe Coira, Fran Araújo, Araceli Gonda, Coral Cruz e Carlos Portela, e mellor música orixinal para as composicións de Elba Fernández e Xavi Font.
MAIORÍA DE IDADE
Organizados pola Academia Galega do Audiovisual, os Mestre Mateo, que cumpren a maioría de idade recoñecendo o traballo de profesionais do sector, celebraron unha cerimonia marcada por discursos en defensa da igualdade e amenizada con actuacións de acróbatas e bailaríns.
As mellores interpretacións protagonistas, tanto feminina como masculina, foron para os principais actores da película ‘Eroski-Paraíso‘, Patricia de Lorenzo e Miguel de Lira, que non puideron acudir á gala pero entraron en vídeo desde Madrid para agradecer con humor os galardóns.
A cinta de Paco Praza, ‘Quen a ferro mata‘, que optaba a quince candidaturas, fíxose con tres premios, o de mellor actor de reparto para o recordado Xan Cejudo, o de mellor actriz de reparto para María Vázquez e a mellor maquillaxe e barbaría para Susana Veira e Beatriz Antelo.
PREMIOS DE HONRA
O Premio de Honra “Fernando Rei” recaeu no proyeccionista do CGAI-Filmoteca de Galicia, José María Rodríguez Armada “Chema”, que enxalzou “un traballo que parece que non se ve, pero aí está”, e o Premio especial “José Sellier” levouno o Festival de cine escolar Olloboi.
Os demais premios Mestre Mateo recaeron no documental ‘Manoliño Nguema‘; o programa de televisión ‘Segredos. Desmontando Galicia‘; a serie web de RTVE e Cósmica Producións ‘Antes de perder‘; a curtametraxe de imaxe real ‘16 de decembro‘; a curta de animación ‘Homomaquia‘ ou no anuncio ‘Santiago, Cidade de Cinema‘.
Ademais, Lucía Regueiro conseguiu o premio á mellor comunicadora de televisión por ‘Bamboleo‘; Marcos Barrios, gañou o recoñecemento á súa realización en ‘Segredos. Desmontando Galicia’ e María Fandiño logrou o galardón de vestuario por ‘Lobos e Cordeiros‘. EFE
