Este luns inaugurouse no Museo Provincial de Lugo a primeira entrega do proxecto “Amar a mar: Mariñas, marosas e maruxainas”, que se centra en recoñecer e visibilizar as mulleres da Mariña Lucense. A mostra inclúe 16 retratos femininos –un por cada un dos concellos da comarca– e outros tantos textos, que inciden no papel das mulleres na configuración material e cultural da comarca.
Segundo explicou a xerente da Rede Museística, Encarna Lago, “trátase dun proxecto colaborativo, produto dun traballo en comunidade, coordinado desde o Museo do Mar de San Cibrao, que pon a mirada nas mulleres que non aparecen habitualmente representadas nos museos, nos textos, nos catálogos”.
Germán Limeres, Xosé Reigosa, Ignacio Castro “Nachok” e Lucía Sánchez asinan as fotografías que amosan o paso do tempo polas facianas e as mans de traballadoras do mar e da terra: pescantinas, redeiras, mariscadoras, percebeiras, empregadas de conserveiras, taberneiras ou labregas.
A mostra, instalada no refectorio do Museo arredor dunha composición con caixas de peixe da lonxa de Burela e unha figura da maruxaina cedida pola Asociación de Amigos da Maruxaina de San Cibrao, complétase con dous paneis informativos de Herminia Pernas e de Chema Leal que documentan a participación das mulleres da Mariña en actividades marítimas nos séculos XIX e XX.
LISTADO TEXTOS E FOTOS
Este é o listado dos textos e fotografías, coa súa autoría.
| CONCELLOS | TEXTOS | FOTOS |
| ALFOZ | Alba Díaz Geada | Dora Tallón Maseda
(Fotografía: Germán Limeres) |
| BARREIROS | Lu Vila | Tarsila Veiga Vega
(Fotografía: Xosé Reigosa) |
| BURELA | Herminia Pernas Oroza,
Doutora en Xeografía e Historia pola USC |
Mª Jesús Alonso López
(Fotografía: Germán Limeres) |
| CERVO | Sara Campo López | Aurora García Fraga
(Fotografía: Germán Limeres) |
| FOZ | María Cuadrado Fernández | Inés Fraga Naray, “Sita”
(Fotografía: Ignacio Castro, “Nachok”) |
| LOURENZÁ | Teresa Díaz Iglesias | Alicia Reigosa Lorigados
(Fotografía: Ignacio Castro, “Nachok”) |
| MONDOÑEDO | Mar Corbelle Valiño | Alicia Tella-Villamarín
(Fotografía: Alicia Puchades) |
| OUROL | Verónica Prieto Prieto | Bárbara Gil García
(Fotografía: Germán Limeres) |
| A PONTENOVA | M. José Fernández | Mª Juana González Díaz, “Juanita”
(Fotografía: Germán Limeres) |
| RIBADEO | Susana Álvarez, “Susi” | María del Carmen del Río Martínez
(Fotografía: Germán Limeres) |
| RIOTORTO | Mari Luz Iglesias López | Hortensia García Freijo
(Fotografía: Germán Limeres) |
| TRABADA | Lucía Fernández Rodríguez | Carmen Murias Bermúdez
(Fotografía: Germán Limeres) |
| O VALADOURO | Cristina Fernández Rey | Piedad Seijas Cao
(Fotografía: Germán Limeres) |
| O VICEDO | Antía Balseiro
|
Leonor Casas Lamela
(Fotografía: Germán Limeres) |
| VIVEIRO | María Carballal Febreiro | Ana López Galdo
(Fotografía: Germán Limeres) |
| XOVE | Lucía Canoura | Josefa Meitín Míguez
(Fotografía: Lucía Sánchez Meitín) |
AS “MELLORES EMBAIXADORAS” DA BISBARRA
Na inauguración da mostra, a vicepresidenta da Deputación, a nacionalista Maite Ferreiro, sinalou que “o máis valioso da mostra son as persoas que ten detrás e que prestaron a súa creatividade, memoria e experiencia vital para render homenaxe a todas as que nos trouxeron ata aquí. Sodes as mellores embaixadoras da Mariña”, concluíu Ferreiro, que tamén se referiu á loita da comarca pola continuidade dos postos de traballo e da produción de aluminio en San Cibrao.
No acto, en formato virtual ante as restricións de mobilidade e capacidade obrigadas pola pandemia, interviron parte das protagonistas da mostra e representantes dos gobernos municipais da Mariña.
INSCRICIÓNS PARA VISITAS PRESENCIAIS
A mostra pode verse, de forma presencial, Museo Provincial de Lugo, anotándose previamente no teléfono 982.242.112 ou do correo concertampl@gmail.com. Tamén está dispoñible a visita virtual a través da plataforma multicanle comunidadermpl.es.
