O Concello de Barreiros celebrará este maio a primeira edición de ‘Versos na Baixamar’ despois de ter sido adiado no pasado mes de outubro. É a súa gran aposta para dinamizar o Día das Letras galegas. Esta edición xuntará varias voces da Mariña que destacan pola frescura e a calidade da súa poesía, completando así unha xornada adicada á figura de Xela Arias.
A poesía de Olalla Cociña, Paula dos Anjos e Daniel Irimia será a protagonista dunha tarde de música e versos, conducida polo narrador oral e poeta Lois Pérez o luns 17 de Maio ás 18h no Centro Sociocultural.
Por outra parte, a autora Andrea Barreira impartirá o luns 10 de maio nos centros escolares de San Cosme e San Miguel o obradoiro “Cada día, a familia” no que a través da figura e da obra de Xela Arias as crianzas reflexionarán sobre as familias e a súa diversidade.
ACTIVIDADES VIRTUAIS
“Ademais destas actividades presenciais, nos vindeiros días presentaranse unha serie de actividades virtuais na que tanto crianzas como maiores poderán participar e que queremos que sirvan de pasatempo á vez que nos axuden a descubrir cousas tanto do noso concello coma das Letras Galegas”, sinalou o concelleiro Dani García nun comunicado.
Ademais, ata o 7 de Maio está aberto o prazo para concursar no certame que organiza a Biblioteca Provincial de Lugo, coa colaboración como cada ano da Biblioteca Pública do Concello de Barreiros, no que o tema deste ano é “o dereito das nenas e nenos a participar na vida cultural”.
