Este xoves celebrarase na Casa de Galicia de Madrid, a sede da Xunta de Galicia na capital española, a presentación da Carreira de Montaña Montes de Viveiro (Camovi), un acto organizado polo Concello de Viveiro.
A Camovi é unha competición de trail que cumprirá a súa novena edición o 27 de abril, e que se consolidou nestes nove anos como un dos eventos deportivos máis importantes do panorama estatal para os amantes deste deporte.
A proba foi pioneira e segue a incorporar novidades. Este ano existe a posibilidade de participar nas seguintes categorías: C42k (percorrido con distancia de maratón, 42 quilómetros), C21K, C10K, C45K relevos, para nenos (Camovi Kids) e andaina.
A Camovi destaca polas súas paisaxes, polo que se define como “puro monte galego”.
Na presentación participarán o director da Casa de Galicia, José Ramón Ónega, o deputado provincial de goberno interior e relacións institucionais, Álvaro Santos Ramos, e dous membros da organización da carreira, entre eles o director técnico, Pedro Esmorís, que realizará un repaso pola historia da carreira.
MOSTRA DOS RECURSOS TURÍSTICOS
Durante a presentación proxectaranse produccións audiovisuais sobre a carreira e os principais recursos turísticos de Viveiro. Ao finalizar ofrecerase un brunch con produtos gastronómicos representativos de Galicia.