O Burela FS cae coa cabeza alta na Copa do Rei tras rozar a proeza no Palau

O poderoso Barcelona apea nos penaltis ao Pescados Rubén da Final Four da competición

Matamoros pelexa polo balón con Ximbinha. PESCADOS RUBÉN BURELA

O Pescados Rubén Burela FS quedou eliminado nos cuartos de final da Copa do Rei despois de esixir o máximo ao poderoso FC Barcelona, que malia xogarse a eliminatoria -a partido único- na súa pista, só foi quen de descabalgar da loita polo título aos da Mariña Lucense na quenda de penaltis.

Os discípulos de Juanma Marrube adiantáronse axiña, por medio de Matamoros, no minuto 3. O cadro burelao padeceu a reacción dos locais e Edu desbaratou oportunidades de Sergio Lozano e Daniel. O técnico alfocego optou polo xogo de cinco para controlar a un rival con grandes individualidades e obtivo resultado ata o cuarto de hora, cando Marcenio logrou o empate.

Á volta dos vestiarios, o Barça estivo a piques de liquidar a eliminatoria con dous tantos case consecutivos, nos minutos 25 e 26, de Sergio Lozano e Ximbinha. Antes de que se cumprise a media hora de xogo, Xande anotou o 3-2 e meteu de novo no encontro ao equipo burelao. Pouco despois, Matamoros acadaba a segunda diana da súa conta particular e equilibraba a contenda, que continuaría na prórroga.

Nos penaltis, un único erro de Renato condenou aos de Juanma Marrube, que quedaron fóra da Final Four da competición despois de rozar a sopresa no Palau Blaugrana.

O SÁBADO VOLVE A LIGA A BURELA, CONTRA EL POZO

O Pescados Rubén Burela FS recibirá a El Pozo Murcia o vindeiro sábado (18.30 horas, Vista Alegre) nun partido crucial para alcanzar a permanencia na Primeira División.

RESPOSTAR

Please enter your comment!
Please enter your name here