O fútbol sala volverá á Mariña Lucense seis meses despois. O Pescados Rubén Burela FS comezará o venres os partidos de pretempada cun encontro fronte ao potente Palma Futsal (20.00 horas), con aforamento reducido en Vista Alegre. Un máximo de 300 espectadores poderán desfrutar do espectáculo, que servirá para preparar a campaña na Primeira División. Este luns aprobouse a data de inicio do curso, que será o 3-4 de outubro, mentres que na Liga feminina, as ‘Guerreiras‘ arrincarán na fin de semana do 17-18 de outubro.
O último partido ao calor da afección dos discípulos de Juanma Marrube foi o pasado 4 de marzo, ante o Cartagena. A tempada foi suspendida días despois pola pandemia.
A entidade laranxa habilitará a venda de entradas anticipada entre mañá, martes 15 de setembro, e o venres (14.00 horas) na sede do club por orde de demanda e ata completar o aforo permitido. O custo do billete será de dez euros para os socios da tempada 2019-2020, e de 15 para os non asociados. O horario será o seguinte:
Martes, mércores e xoves 10-00-14.00 // 16.00-19.00 horas
Venres 10.00-14.00 horas
