Festival de goles do Pescados Rubén Burela FSF, que se desfixo con comodidade do Sala Zaragoza no inicio da Tarde Laranxa. As pupilas de Julio Delgado e Lucas ofreceron un recital de acerto goleador sobre a rede do cadro maño, cun resultado final de 8-3.
O cadro da Mariña Lucense adiantouse aos 25 segundos de xogo, ao definir Leti no segundo pau. Lara enviou un balón ao traveseiro antes do 2-0, obra de Jenny no minuto 4, nada máis saír aao parqué. O cadro aragonés recurtou diferencias pouco despois por medio de Livia, pero Cami axiña selou o 3-1, asistida por Bea Mateos. Cilene, a dous minutos do descanso, ampliou a renda das locais.
Paola deu azos ao conxunto visitante á volta dos vestiarios, pero foi só un espellismo. Cilene culminou unha triangulación de Leti e Peque para rubricar o 5-2. O 6-2 chegaría xa no ecuador do segundo acto, obra de Dany. Segundos despois, Cami anotou o 7-2. Jenifer Sousa marcou o terceiro do equipo maño cunha picada ao bordo da área, e María Moreno, en propia portería, fixo o definitivo 8-3. O final do partido chegou con tres dobres penaltis para as locais, nas zapatillas de Elena Aragón, sen máis movementos no electrónico.
FICHA TÉCNICA
Pescados Rubén Burela FS: Sandra Buzón, Cristina, Peque, Lara Balseiro, M. Cortés, cinco inicial; tamén xogaron Jenny, Ale de Paz, Elena Aragón, Cilene, Bea Mateos, Cami, Dany.
Sala Zaragoza FS: Ana Etayo, Livia, Paola, Rafinha, Carmen Alonso, cinco inicial; tamén xogaron Jenifer Sousa, Rapha, Aitana, María Moreno.
Goles: 1-0, minuto 1, M. Cortés; 2-0, minuto 4, Jenny; 2-1, minuto 5, Livia; 3-1, minuto 7, Cami; 4-1, minuto 18, Cilene; 4-2, minuto 24, Paola; 5-2, minuto 25, Cilene; 6-2, minuto 30, Dany; 7-2, minuto 33, Cami; 7-3, minuto 38, Jenifer Sousa; 8-3, minuto 39, María Moreno (p. p.).
Árbitros: Menéndez Nistal // Vilas López. Por Burela amarela a Bea Mateos (minuto 10). Por Zaragoza amarela para Rapha (minuto 27).
Incidencias: Partido correspondente á xornada 6 de Primeira División Feminina disputado en Vista Alegre, a porta pechada, como inauguración da Tarde Laranxa, que contou coa presenza do director técnico do CNFS da RFEF, José Venancio López Hierro, e do vicepresidente da RFGF, Pablo Prieto.
BROCHE COA VISITA DO JAÉN
A Tarde Laranxa en Vista Alegre poñerá o broche coa xornada 11 de Primeira Masculina ás 20.30 e a visita de Jaén Paraíso Interior.
