Demasiado Barcelona para un Pescados Rubén FS que pagou unha mala primeira metade

O equipo que adestra Juanma Marrube perdía 3-0 ao descanso ante o campión de Copa e a súa reacción na segunda metade non lle alcanzou para puntuar

Pazos tenta presionar ao barcelonista Matheus. FCB

O Pescados Rubén Burela FS puxo o punto e final este martes á competición de 2020 en Barcelona (5-2), nunha cita na que o equipo laranxa foi de menos a máis, pero o seu esforzo non lle valeu para puntuar ante un grande da Primeira División que comeza a remontar o voo tras un mal inicio, e que vén de gañar a Copa. A vantaxe do conxunto blaugrana de 3-0 ao descanso pesou demasiado, a pesar da boa reacción galega no regreso dos vestiarios.

Na primeira parte o equipo galego sufriu, non estivo a gusto. O enfoque non foi o axeitado, o equipo non cría nas súas posibilidades, fronte a un Barcelona que se ofreceu moi completo en plena celebración do recente título copeiro. Plantouse o Pescados Rubén en media pista aplicado en defensa fronte ao toque blaugrana, que xerou moito perigo. Trala triangulación entre Ximbinha, Marcenio e Esquerdinha no minuto 7, os de Andreu Plaza ampliaron distancias no 11 con Joselito e no 18 con Adolfo, a porta baleira, coa iniciativa de porteiro xogador para os burelistas no últimos seis minutos antes da bucina.

Tralo descanso, a actitude do equipo laranxa cambiou e viuse reflectida sobre a pista. Aínda que o Barça ampliou a fenda, no 29, en contragolpe de Lozano culminado por Ferrao, o Pescados Rubén non baixou os brazos. Segundos despois, Renato estreou o luminoso para os da Mariña, de falta e pola escuadra, e no 31 Iago Míguez pechou a triangulación con Pazos e Pitero. Co 4-2, o conxunto que prepara Juanma Marrube creu en si mesmo, aínda que o lastre do primeiro ecuador pesaba demasiado. Regresou o xogo de cinco ao Palau para os de Burela, pero a recompensa foi para os locais que sentenciaron co definitivo 5-2 a porta baleira no 37, do gardameta Dídac.

FICHA TÉCNICA

FC Barcelona: Dídac, Adolfo, Lozano, Ferrao, Joselito, cinco inicial; tamén xogaron Ximbinha, Marcenio, Esquerdinha, Dyego, Daniel, A. Coelho, Matheus.

Pescados Rubén Burela FS: Edu, Iago Míguez, Javi Rodríguez, Renato, Quintela, cinco inicial; tamén xogaron David Pazos, Álex Diz, Lucho, Matamoros, Pitero.

Goles: 1-0, minuto 7, Ximbinha; 2-0, minuto 11, Joselito; 3-0, minuto 18, Adolfo; 4-0, minuto 29, Ferrao; 4-1, minuto 29, Renato; 4-2, minuto 31, Iago Míguez; 5-2, minuto 37, Dídac.

Árbitros: Blas Alonso // Romero Candela. Por Barcelona amarela a Esquerdinha (minuto 17), Ferrao (minuto 28). Por Burela amarela a David Pazos (minuto 40).

Incidencias: Partido correspondente á xornada 15 disputada no Palau Blaugrana coa emisión en directo por Teledeporte.

A ESTREA DE 2021, O DÍA 4

A competición ligueira regresará para os da Mariña o luns 4 de xaneiro, coa visita de Peñíscola Globeenergy, correspondente á xornada 16, penúltima da primeira volta.

RESPOSTAR

Please enter your comment!
Please enter your name here