O Xove Costa Trail 2021 celebrarase durante a última fin de semana de agosto e contará con percorridos para menores e adultos. Esta nova edición presentouse o pasado venres día 13 de agosto coa presenza do alcalde de Xove, Demetrio Salgueiro, a concelleira de Deportes, Cristina Iglesias e a organización do evento deportivo.
Haberá dúas probas trail, unha de 25 km e outra de 15 km, que transcorrerán maioritariamente pola Senda Costeira de Xove. Pola súa parte, a Andaina tamén seguirá a mesma ruta pola costa do concello.
A Andaina sairá da praia de Esteiro, Xuances, e chegará á praia de Morás, na parroquia do mesmo nome. O percorrido total para esta proba será de 15 km.
As carreiras para adultos están divididas en dúas probas, unha de 25 quilómetros e outra de 15 quilómetros. A primeira sairá da praia de Portonovo e a segunda sairá de Punta Mansa. Ambas terán como punto de chegada o Centro Cívico de Xove.
CARREIRAS PARA NENOS E ENTREGA DE PREMIOS
As carreiras para nenos e nenas percorrerán o espazo entre o cabo e a praia de Morás. Os maiores percorrerán unha distancia de 1.500 metros e os máis pequenos terán unha distancia de 700 metros.
A entrega de Trofeos terá lugar na Praza do Concello de Xove sobre as dúas da tarde.