EFE. O fondo suízo Parter Capital presentou as garantías de liquidez que Alcoa lle requería para completar a compra das plantas de Avilés e A Coruña, de xeito que este mércores quedará pechada a compraventa das fábricas, das que a multinacional estadounidense do aluminio pretendía desfacerse.

A ministra de Industria, Reyes Maroto, comunicou a nova trala reunión da comisión de seguimento dos acordos polo mantemento da actividade industrial nas dúas fábricas.

As garantías adicionais que se lle requerían a Parter Capital ascenden a 30 millóns de dólares (uns 27 millóns de euros) e esa cantidade non será percibida por Alcoa senón que se quedará como respaldo das futuras operacións das plantas.

686 TRABALLADORES

Remata así un proceso iniciado o pasado 17 de outubro, cando Alcoa anunciou o peche das factorías da Grela e San Balandrán, que empregan a 686 traballadores.