A ministra de Industria en funcións, Reyes Maroto, visitará o vindeiro martes, día 8 de outubro, o complexo industrial de Alcoa en San Cibrao, en Cervo.

A dirixente do Goberno socialista comprometérase comité de empresa a visitar a planta. Os sindicatos queren transmitirlle a importancia da fábrica, que xera arredor de 2.000 empregos, para a comarca da Mariña Lucense.

Segundo informou o comité de empresa, este mesmo martes tamén acudirá á factoría o presidente da Xunta de Galicia, o popular Alberto Núñez Feijóo.

A multinacional puxo en cuestión a fábrica de aluminio primario do complexo industrial cervense -a única operativa en España– sen un abaratamento da enerxía eléctrica, que supón o 40% dos gastos de produción da mesma. No pasado mes de agosto, reduciu a produción nun 11%, coa parada de 32 cubas das 512 de electrolise.

REUNIÓN CO COMITÉ

Os traballadores reuniranse cos representantes do Goberno central e da Xunta a mediodía. O presidente do comité de empresa da fábrica de Alcoa en Cervo, Xosé Paleo, espera que a ministra de Industria chegue “cunha solución” e non “cun parche” para “saír do paso”.

Paleo aclarou que na reunión que manterán coa ministra e co presidente da Xunta, xusto ao finalizar a visita á fábrica de San Cibrao, os representantes do comité de empresa volveranlle pedir que o Goberno dea os pasos necesarios para establecer “un marco tarifario” que lle permita a esta factoría “competir en pé de igualdade coas da súa contorna“.

“Cando visite a factoría, verá o tamaño da fábrica e entenderá mellor do que estamos falando”, dixo Paleo, dado que a actividade de Alcoa representa algo máis do 30% do Produto Interior Bruto (PIB) da provincia de Lugo.

Paleo dixo que se necesita por parte do Goberno de España “unha solución urxente” para que Alcoa “decida subir de novo a intensidade e poñer a funcionar as cubas que están paradas neste momento. Non nos gusta estar así. Non nos gusta estar ao bordo do abismo“, lamentou.