Os traballadores de Reymogasa continuaron este mércores co calendario de protestas tras renunciar a empresa auxiliar ao contrato de mantemento mecánico no departamento de dixestión do complexo industrial de Alcoa, en San Cibrao.
Os obreiros reclaman a subrogación por parte da empresa que asuma os traballos dos 65 empregados que realizaban estas tarefas, nas “mesmas condicións” laborais. O comité díxose “excluído” das conversas para o novo contrato e esixe “transparencia” no proceso de sustitución empresarial.
ESTE XOVES, NOVA PROTESTA
Segundo informou o comité, ao longo da tarde haberá reunións entre os sindicatos e as empresas. De non frutificar un acordo, os empregados convocaron unha nova protesta para o vindeiro xoves, 31 de outubro, de sete a oito da mañá, cunha marcha desde os vestiarios de Reymogasa á portería do complexo industrial de Alcoa en San Cibrao.
