O presidente do Partido Popular de Burela, Manuel Rouco, cualificou de “disparate” a decisión da Secretaría Xeral de Pesca do Goberno socialista en funcións de de autorizar desde o pasado luns a reapertura da pesca do bonito (atún branco do norte) en augas do océano Atlántico. A decisión é “especialmente indignante” tendo en conta que, na práctica, só beneficia á frota canaria.
Os populares fanse eco do “malestar e da indignación” xerada entre a frota lucense por unha nova decisión do Goberno de Sánchez que “despreza á Mariña lucense. O Executivo socialista autoriza a reapertura da pesca en pleno de mes de novembro, cando os barcos están dedicados a outras labores e exclúe expresamente desta autorización ás embarcacións que participaron na costeira durante o verán”.
Por se fora pouco, Rouco lembra que a frota de baixura do Cantábrico sufriu este ano “a costeira máis breve da historia”, ao pecharse o 23 de agosto, mes e medio antes do habitual, alegando daquela o esgotamento da cota. “É unha tomadura de pelo que reabran a costeira dous meses despois de impoñer á frota que deixaran de pescar cos caladoiros cheos de túnido”, argumenta.
O PASADO ANO, ESCENARIO SIMILAR
Rouco lamenta a “improvisación e falta de planificación” coa que o Ministerio está a tomar as decisións en materia de estratexia pesqueira. No pasado ano, o Goberno central reabriu igualmente a pesquería despois de pechala, daquela en outubro, sen posibilidade de faenar para as embarcacións dirixidas.