O presidente do comité de Alcoa San Cibrao, José Antonio Zan, expón que o complexo industrial de Cervo aforraría “105 millóns anuais” a causa do prezo da enerxía eléctrica “se a planta estivese ubicada en Francia“. Así o expuxo o sindicalista durante a visita ao complexo industrial de Cervo da voceira nacional do BNG, Ana Pontón, e do deputado no Congreso da formación nacionalista, Néstor Rego, entre outros representantes do partido frontista.
Segundo o sindicalista, a fábrica gasta 3,5 millóns de megavatios (MW) ao ano, “e agora mesmo estamos nun prezo da electricidade que é 30 euros superior ao de Francia, de xeito que de estar ubicada neste país a factoría aforraría 105 millóns neste gasto”.
“Co prezo que tiñamos con anterioridade, de entre os 35 e os 40 euros/megavatio, podiamos competir con países como Francia ou Alemaña, aínda cun gasto máis alto. Pero agora non podemos suplir unha merma de 30 euros de diferenza”, lamenta.
Zan asegura que a planta de aluminio de San Cibrao, que Alcoa ve “inviable” sen un abaratamento da luz, afronta “unha problemática de emerxencia“, agravada pola “nova subasta de interrompibilidade que acaba de quitar o Goberno central, cunha baixada de cantidade en poxa de 2.340 a 1.000 MW, e a eliminación dos bloques de 40 MW, que son os que apoiaban directamente ás empresas electrointensivas e hiperelectrointensivas”.
“Temos un problema global neste sentido a nivel español”, razoa Zan, que se pregunta “se o Goberno quere prescindir da industria electrointensiva, que non é outra que a pesada: aceiro, aluminio. Non pode ser que Arabia Saudí, un país que ten diñeiro, e que pode apostar pola industria que prefire, estea montando plantas de aluminio, mentres que aquí estámolas a pechar porque non se lexisla e se pon un marco enerxético competitivo e estable”, argumenta.
O comité aínda non ten novas do Ministerio de Industria, a quen os sindicatos reclaman unha xuntanza para conformar a mesa de seguimento polo futuro da planta comprometida hai meses. As centrais tamén pediron unha reunión co presidente da Xunta de Galicia, Alberto Núñez Feijóo.
Respecto da concentración ante a Subdelegación do Goberno central en Lugo, convocada para o mediodía do vindeiro sábado, Zan agarda “que vaia toda a xente que poida”, aínda que lembra que “o importante” é “que tome nota quen ten que tomar a decisión, o Executivo”.
