O comité de Alcoa San Cibrao chama a participar na concentración do vindeiro sábado, 13 de novembro, desde as 12.00 horas fronte á Subdelegación do Goberno en Lugo, para reclamar ao Executivo central un abaratamento da luz sen o que a multinacional ve “inviable” a planta de aluminio. Os sindicatos piden respaldo ante a que cualifican como “a semana máis decisiva en 40 anos de historia” do complexo industrial de Cervo, cunha poxa de interrompibilidade que -advirten- pode desembocar nun anuncio de peche por parte da compañía estadounidense.
Os recortes na potencia a subastar -de 2.340 MW a 1.000 MW- e a fragmentación dos bloques -coa eliminación dos lotes de 40 MW, os que máis interesan á industria pesada-, auguran un mal resultado para Alcoa, que leva anos queixándose do prezo da electricidade e que podería ver como non saca partido dun dos recursos legais usados polo Executivo estatal para aliviar o custo da luz ás grandes empresas.
Nun contexto no que Alcoa anunciou un plan de axuste a nivel mundial que prevé recortes na produción e o peche de plantas, os traballadores cren que San Cibrao está entre as posibles afectadas dado o prezo da electricidade, que supón o 40% dos gastos de produción de aluminio e que é “30 euros superior” ao de países como Francia ou Alemaña.
Os obreiros entregarán na sé do Executivo central na capital de provincia unha carta para reclamar a creación dunha mesa de seguimento para o futuro da planta de aluminio de San Cibrao. Doce Concellos da bisbarra fletarán autobuses para unha concentración na que o comité pretende reivindicar a importancia do complexo industrial -que dá traballo a 1.150 persoas de xeito directo, arredor de 600 só na planta ameazada de peche por Alcoa– para a economía da Mariña Lucense.
O MÉRCORES, ENTREVISTAS COS PARTIDOS EN MADRID
A semana que vén preséntase frenética no tocante á actividade para o comité. O luns, os sindicatos entrevistaranse co presidente da Xunta, Alberto Núñez Feijóo, e o mércores acudirán ao Congreso dos Deputados, onde se verán con representantes de Podemos e BNG, quedando por concretar posibles encontros con delegados de PSOE e Ciudadanos. Pablo Casado recibiraos en Génova, na sé do Partido Popular.