InicioEconomíaOs obreiros de Muebles Hermida reciben as notificacións do Fogasa e esperan...

Os obreiros de Muebles Hermida reciben as notificacións do Fogasa e esperan cobrar en febreiro

A previsión é que o Erte, cun período máximo de 270 días, entre en vigor esta semana; os traballadores, que acumulan cinco meses de impagos, buscan alternativas

Publicada o

- Advertisement -

Os traballadores de Muebles Hermida, que aceptaron un expediente de regulación de emprego temporal (Erte) despois de que a empresa solicitase o concurso voluntario de acredores polas débedas acumuladas, recibiron este luns as primeiras certificacións por parte do Fondo de Garantía Social (Fogasa), ao que solicitaron o cobro das súas nóminas correspondentes aos meses de setembro, outubro, novembro e decembro.

Os 93 obreiros da moblería de Lourenzá, que desde o pasado 13 de xaneiro están de permiso retribuído ata que entre en vigor o Erte, cumpriron este xaneiro cinco meses sen cobrar despois de que a firma aboase, días antes do Nadal, medio mes de agosto. A notificación por parte do Fogasa, que informa do visto bo aos pagos, transmite “un pouco de tranquilidade” a un persoal que padece as dificultades dos impagos, segundo expón o presidente do comité de empresa, Manolo Franco.

Hai xente que o está a pasar moi mal. Algún dos empregados ten cinco fillos, xente humilde e emigrante… A ver se podemos cobrar rápido”, indica Franco, que precisa que as previsións do administrador concursal, Javier Reigosa, é que poidan percibir o adebedado “a mediados de febreiro, sobre o día 10 ou 11″.

Sobre o Erte, o administrador concursal prevé que poida aplicarse desde esta semana, sempre á espera dos tempos da tramitación, e xa prepara a documentación para presentar na Sociedad Estatal de Participaciones Industriales (Sepi).

Á ESPERA DUNHA POSIBLE COMPRA

Segundo o pactado co comité de empresa, que someteu o documento a votación entre o persoal, o período máximo de aplicación do expediente de regulación de emprego temporal será de nove meses. De atoparse unha solución para a empresa, que pasa por un comprador ou unha inxección de capital, Muebles Hermida chamará aos empregados para reincorporarse, de xeito que, se están a traballar noutra firma, terán a elección última de se volver ou ficaren nos seus postos.

“A maioría xa está buscando algo, porque é un período moi longo e hai que traballar”, indica Franco. No tocante a unha posible compra de Muebles Hermida, que os traballadores ven como a única posibilidade para reflotar a moblería, o sindicalista sinala que “por agora non sabemos nada. Estase a negociar, pero non hai nada concreto”, conclúe.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...