A Xunta cuestiona que o estatuto favoreza a Alcoa: “hai menos diñeiro e máis beneficiarias”

Conde lembra que as axudas comprometidas polo Goberno central, de 262 millóns, "a metade que no 2017", se repartirán entre 600 empresas

O conselleiro de Economía, Francisco Conde. GALICIA CONFIDENCIAL

O conselleiro de Economía, Emprego e Industria da Xunta de Galicia, Francisco Conde, criticou este martes que o borrador do estatuto para o consumidor electrointensivo presentado o pasado luns polo Goberno central teña unha menor “dotación económica” e máis beneficiarios que en 2017, polo que dubidou de que “poida dar resposta” ás empresas que consumen máis enerxía, como é o caso de Alcoa.

Así se pronunciou Conde en declaracións aos xornalistas esta mañá na Coruña antes de participar na presentación do informe ‘Retos e perspectivas de investimento en Galicia para 2020‘.

“Temos unha dotación económica que é a metade do que tiñamos en 2017, con máis beneficiarios”, insistiu o conselleiro en alusión ao borrador.

O estatuto das electrointensivas beneficiará a unhas 600 industrias con alto consumo eléctrico, ás que se bonificará nun 85% os cargos da súa factura, o que lles supoñerá un aforro conxunto duns 90 millóns que, sumados ás compensacións por custos de CO2 (172 millóns o pasado ano), elevarán a máis de 262 millóns o apoio a estas industrias.

Segundo Conde, con “menos diñeiro e máis empresas” é “moi difícil que as empresas que máis necesitan esta axuda como Alcoa San Cibrao poidan gozar dun prezo competitivo”.

Por iso, solicitou ao Goberno central que non traslade “operacións estéticas” e que ofreza “solucións e medidas que poidan dar esa resposta” aos consumidores de enerxía.

“O Goberno obviou todas as propostas que desde a Xunta de Galicia trasladamos precisamente para poder establecer medidas que permitan un prezo competitivo”, afeou o titular de Economía tras coñecer o borrador.

UGT AGRADECE “O AVANCE” PERO ANUNCIA ALEGACIÓNS

A Xunta de Galicia non confirmou se presentará alegacións ao documento. Si o fixo a Federación de Industria, Construción e Agro (FICA) de UGT, que malia “agradecer” ao Ministerio Industria “o cumprimento do compromiso adquirido cos axentes sociais”, e entender “o estatuto presentado como un avance, pois supón o recoñecemento de especificidade aos sectores industriais cun elevado consumo de electricidade, pero, atendendo ao exposto onte”, o sindicato instará “a que os mecanismos de apoio nos que se basea sexan ampliados e aumentados para lograr o obxectivo da procura dun prezo eléctrico, que elimine o diferencial con países da nosa contorna en Francia e Alemaña, como máxima garantía de emprego e condicións laborais de traballadores sector”.

Para UGT FICA é necesario “implementar as compensacións por costes de emisións indirectas de CO2 na maior porcentaxe posible e para iso os Orzamentos Xerais do Estado (PGE) deben recoller a máxima contía marcada na directiva da Unión Europea nesta materia, ademais de seguir no camiño de eliminar cargas sobre o prezo da electricidade e o gas, nos custos regulados e os non vinculados ao fornezo”.

A central sindical reitera “a necesidade de incluír no estatuto medidas de protección do emprego e das condicións laborais que obrigue ás empresas que se vexan compensadas por estas medidas a garantir a continuidade industrial evitando a deslocalización a países da nosa contorna UE, que favorecen unha tarifa eléctrica reducida”.

No tocante ás alegacións que o sindicato “está a elaborar no actual período de consulta pública”, o sindicato abordará “a necesidade de levar a cabo un seguimiento do cumprimento dos requisitos establecidos polo decreto para acceder ás condicións marcadas”.

RESPOSTAR

Please enter your comment!
Please enter your name here