Maroto reivindica o “esforzo” do Goberno a prol das electrointensivas “fronte ao ruído” do PP

A ministra de Industria asegura que o Estado estuda as alegacións presentadas ao documento; os traballadores de Alcoa San Cibrao manifestaranse este mércores en Lugo

Reyes Maroto atende aos medios de comunicación. AXM

A ministra de Industria, Reyes Maroto, reivindicou este martes no Senado o “esforzo enorme” do Goberno central polas empresas electrointensivas fronte a “moito ruído e desinformación” que atribuíu ao PP na problemática. A dirixente do Executivo estatal asegurou que o Estado “estuda” as alegacións presentadas ao estatuto para os grandes consumidores de enerxía, documento ao que alegaron os sindicatos, as firmas e tamén as Autonomías de Galicia, Cantabria e Asturias.

En resposta ao senador do Partido Popular, José Manuel Barreiro, estimou que o seu departamento contaba en 2018 con “seis millóns para esa industria que di que se está enganando”. A cambio, indicou que a partida para compensacións por emisións indirectas de dióxido de carbono (CO2) subiu a “172 millóns en compensacións“.

A representante estatal detallou que ese montante, “o maior importe anual”, incluíu como “principais beneficiarios” a once solicitudes procedentes de Galicia, que mereceron “máis de 42 millóns de euros”. “Un de cada catro euros a subvencionar axudou á industria galega, a favor de Galicia”, subliñou.

PIDE “LEALDADE” Á XUNTA

Ao mesmo tempo, considerou que a comunidade autónoma é unha “das que máis mobilizaron” o Plan Reindus, “pendente da firma dun convenio co Goberno galego”. Neste sentido, Maroto desexou que a Xunta de Galicia “estea á altura das circunstancias” e mostre “lealdade” cara ao Executivo central. Sobre as empresas electrointensivas, a ministra de Industria admitiu a súa “situación complicada” durante a súa comparecencia no Senado, aínda que xustificou que as actuacións para desenvolver teñen que executarse “conforme á normativa comunitaria“. Do mesmo xeito, instou ao PP a permitir a aprobación das axudas previstas.

“Reclaman axudas e o lóxico é que non impidan que se tramiten os Orzamentos, é aí onde temos que fixar o debate”, considerou. Doutra banda, esixiu “seriedade e responsabilidade, polos seus feitos veremos se queren contribuír a mellorar este país, ser parte da solución ou quedar de final”. Finalmente, reclamou que o PP non permaneza “instalado no bloqueo; está nas súas mans traballar polo futuro da industria electrointensiva, tendémoslles a man”.

O COMITÉ LEVA AS PROTESTAS Á DEPUTACIÓN

O comité de empresa de Alcoa San Cibrao convocou para o vindeiro mércores, 26 de febreiro, unha manifestación en Lugo que partirá da estación de autobuses, ás 10.00 horas, para rematar fronte ao Pazo de San Marcos, sé da Deputación, cuxo pleno provincial está previsto para as 11.00.

Sete autocares -fletados polos sindicatos e polos Concellos de Xove e Cervo- partirán da Mariña Lucense para a protesta, que reclama ao Executivo central que acepte as alegacións e modifique o estatuto das electrointensivas a fin de garantir o futuro dunha planta, a de aluminio do complexo industrial cervense, que a multinacional ve inviable sen enerxía máis barata.

RESPOSTAR

Please enter your comment!
Please enter your name here