Os sindicatos e a dirección de Reymogasa manterán o vindeiro venres a última reunión do período de consultas do Expediente de Regulamento Temporal de Emprego (Erte) anunciado pola auxiliar de Alcoa despois de que a multinacional renunciase ás tarefas de brascaxe das cubas de electrolise. A empresa e a parte social ultiman un acordo do que quedan pendentes algúns puntos por solucionar, segundo aseguraron fontes sindicais.

O comité de empresa presentou ao persoal unha proposta que foi respaldada en parte. Deste xeito, en principio o Erte afectará a 33 duns 75 traballadores da auxiliar ata o 31 de decembro, durante un período máximo por traballador de seis meses, cun calendario rotatorio segundo a dispoñibilidade dos obreiros. Estes puntos foron respaldados pola asemblea, pero quedan cuestións por dirimir para o venres, entre elas as económicas.

O organismo de representación dos traballadores admite que a xuntanza do venres é a última posibilidade, por cuestión de prazos, que teñen os obreiros para alcanzar un acordo coa dirección que evite que Reymogasa “execute o Erte segundo a súa vontade“.

TRECE AFECTADOS EN CYRGASA

En Cyrgasa, sindicatos e dirección abriron este mércores o período de consultas do Erte anunciado, que en principio afectaría a 13 obreiros ata o 31 de decembro.

Os sindicatos, que solicitaron os contratos de Cyragasa con Alcoa ao presentar a empresa un Erte por razóns produtivas e económicas, traballan nunha contraproposta para tentar recolocar aos traballadores afectados noutros postos, naqueles casos nos que sexan compatibles con outras tarefas. O comité considera que a adopción de recortes deste calibre pódese dilatar no tempo ante unha medida, a da renuncia ao cambio de cubas, que a multinacional estadounidense cualificou de “temporal“.

PROPOSTA DE CALENDARIO ROTATORIO

A proposta, a partir do informe elaborado, deberá ser refrendado pola votación da asemblea de persoal. “Se é algo coxuntural, cremos que a decisión do Erte é precipitada e excesiva. Dos trece obreiros afectados, hai un en prexubilación e outros dous están de baixa, sobre un persoal de 96 persoas. Pensamos que facendo un esforzo todos podemos recolocar á maioría”, precisa o presidente do comité, Diego Fernández.

“Todos os operarios vanse un mes de vacacións entre os meses de xuño, xullo, agosto e setembro; buscamos un calendario rotatorio no que se poida recolocar aos obreiros en tarefas nas que non se necesite dunha experiencia técnica previa, como o porto, obra civil ou xestión de material”, concreta Fernández.

Unha alternativa similar foi adoptada en Rodabell, empresa na que o recorte do cambio de cubas afectaba a oito empregados.

A vindeira reunión do período de consultas será tamén o venres; antes, faranse microrreunións co persoal para votar a proposta.

O presidente da Xunta de Galicia, Alberto Núñez Feijóo, e o conselleiro Francisco Conde mantiveron este mércores unha xuntanza con representantes de CC OO, entre eles Víctor Ledo, secretario xeral de Industria en Galicia do sindicato.

A XUNTA INSISTE EN RECLAMAR O ESTATUTO

Conde insistiu en reclamar ao Goberno do Estado a aprobación do estatuto do consumidor electrointensivo, comprometido polo Executivo socialista. O conselleiro esixiu ao Executivo central que “reaccione e achegue estabilidade e futuro aos traballadores de Alcoa San Cibrao e da industria auxiliar”.

Ao mesmo tempo, insistiu na “necesidade” de que o Goberno atenda as alegacións remitidas pola Xunta “en consenso co sector: incluír a categorización de consumidores hiperlectrointensivos, estabilidade ou a redución nas peaxes de transporte, entre outras cuestións”.

Neste sentido, lembrou que estas peticións son compartidas tamén polos gobernos de Asturias e Cantabria: “Xa lle temos trasladado ao Goberno que o borrador do Estatuto é insuficiente: non ofrece un prezo competitivo que baixe a 25-30 euros/MWh”, explicou.

O conselleiro afirmou que “sen prezo eléctrico que permita traballar en igualdade de condicións que o resto da industria electrointensiva, Alcoa San Cibrao deixará de producir aluminio primario“.

CC OO PIDE Á XUNTA QUE “CUMPRA” COA INTRODUCIÓN DO GAS EN ALUMINIO

Pola súa banda, Ledo reclamou á Xunta que “cumpra” cos compromisos adquiridos co comité de empresa, entre eles “desbloquear a licenza medioambiental integrada para meter o gas na planta de aluminio”, ademais de “financiar nun 30% esta obra, con garantías de eficiencia enerxética e da retirada dos Ertes presentados nas auxiliares”.