Os traballadores de Alcoa San Cibrao iniciaron a primeira hora da mañá deste venres os actos de protesta despois de anunciar a multinacional que pretende iniciar un despedimento colectivo na planta de aluminio primario do complexo industrial, co despedimento de 534 obreiros de 633, máis do 84% do persoal da factoría.
Os obreiros montaron barricadas de pneumáticos na vía de entrada do complexo industrial, cortando o acceso ao mesmo. Os sindicatos reuniranse este venres para aprobar un calendario de protestas tralo anuncio realizado por Alcoa, que consideran “arbitrario” e “vergoñento”. O programa de reivindicacións do persoal estará condicionado, polo de agora, polo estado de alarma, que limita as reunións multitudinarias.