O Goberno segue sen comprometer prazos para o estatuto das electrointensivas

O Executivo central asegura que espera retomar "o máis axiña posible" o documento, cuxa tramitación "interrompeu" o coronavirus

A ministra María Jesús Montero. GALICIA CONFIDENCIAL

O Goberno central espera recuperar a tramitación do estatuto das electrointensivas “o máis axiña posible”, unha vez a evolución da pandemia permita destinar os recursos e a capacidade necesaria, sobre todo para solucionar os despedimentos anunciados esta semana por Alcoa en Galicia.

Así o avanzou a ministra portavoz e de Facenda, María Jesús Montero, trala reunión do Consello de Ministros extraordinario deste venres, no que admitiu que ao Executivo “gustaríalle contar xa” co estatuto aprobado.

Con todo, pese a que a norma xa estaba “moi avanzada”, a chegada do Covid-19 ao país interrompeu a seu tramitación o pasado mes de marzo, aínda que sinalou que o sector xa coñece as premisas sobre as que se está traballando.

Alcoa abriu o xoves un período informal de consultas para o despedimento colectivo dun máximo de 534 empregados da súa planta de aluminio primario de San Cibrao, no municipio de Cervo (Lugo), xustificándoo na súa produción “ineficiente” e situación “insostible”.

Montero manifestou que se trata dunha decisión da empresa que se suma a axustes que xa viña realizando nos últimos anos –en 2018 anunciou o peche das súas plantas na Coruña e Avilés (Asturias)-, polo que lle pediu que reconsidere esta decisión, en liña coa petición trasladada por parte da ministra de Industria, Comercio e Turismo, Reyes Maroto.

De feito, a ministra portavoz defendeu que o Goberno esta traballando “de forma moi intensa” para axudar a este tipo de industria, que considera “moi importante” para o país, a través, non só de axudas ao CO2, senón tamén co chamado Plan Reindus e co propio estatuto electrointensivo.

MAROTO SOSTÉN QUE ALCOA DEBERÁ DEVOLVER “38 MILLÓNS” SE EXECUTA DESPEDIMENTOS

Montero engadiu que o Goberno está “en permanente contacto” co sector industrial, non só trala decisión anunciada agora pola multinacional estadounidense productora de aluminio, senón de forma previa e coa situación individual de cada unha das empresas que se viron con problemas.

Por outra banda, Maroto sinalou que nos últimos dous anos houbo un investimento de 38 millóns de euros en Alcoa San Cibrao “coa condición de manter o emprego“.

RESPOSTAR

Please enter your comment!
Please enter your name here