O comité cre “solvente” o proxecto de Liberty House para San Cibrao e chama ás Administracións a intervir

Os sindicatos reclaman á Xunta e ao Goberno que freen o ERE para evitar a parada de cubas, coa que Alcoa quere "meter" no proceso de venda "outros actores" non produtivos

O comité de empresa, na protesta das Catedrais. REBELIÓN ALUMINIO

Liberty House Group/GFG Alliance, o conglomerado metalúrxico británico interesado en adquirir a planta de Alcoa en San Cibrao, Cervo, presentou aos traballadores un proxecto “solvente“, en palabras do presidente do comité de empresa da planta mariñá, José Antonio Zan.
Á saída do encontro mantido esta tarde en Santiago de Compostela entre os representantes dos traballadores e o grupo industrial británico, o presidente do comité afirmou aos medios que a formulación trasladada polos representantes do potencial comprador da factoría lucense trátase dun proxecto “concreto, solvente e claro, e con ganas de seguir facendo aluminio primario en España”.
Zan destacou “a experiencia” do grupo británico, que se fixo con varias plantas nos últimos anos en Europa, e considerou que “eles saben perfectamente como levar a cabo este proceso de transición e conseguir esa viabilidade para a planta en oito semanas”.
Os dous representantes de Liberty House Group non fixeron declaracións aos xornalistas que esperaban á saída da reunión celebrada na sede de UXT-Galicia en Santiago de Compostela.
O portavoz dos traballadores afirmou que Liberty House Group “quere as cubas funcionando” e engadiu que “o interese” exposto por Alcoa de parar a maquinaria poida ser un recurso “para meter outros actores que realmente ao que nos vai a levar é ao mesmo proceso que levou noutras fábricas como pasou na Coruña e Avilés“.
Igualmente, apelou ao Goberno central e á Xunta de Galicia, “que agora están aliñados”, dixo, para que “obriguen” a Alcoa a paralizar o ERE vixente, e acusou á multinacional norteamericana actual propietaria da factoría de San Cibrao de cometer “fraude de lei, como é ter unha solución e non querer aplicala, e só querer paralizar a produción e proceder aos despedimentos”.

UNHA PLANTA DE COXERACIÓN ELÉCTRICA

“A ver se seguimos tendo as Administracións do noso lado e podemos obrigar a Alcoa a que paralice o ERE durante unha semana ou dez días máis, e poder dar prazo para que senten con estes industriais (en alusión ao grupo británico) e poder chegar a un acordo para dar viabilidade á planta e aos postos de traballo”, aseverou.
Explicou Zan que o proxecto que lles presentou Liberty House Group contempla a adquisición de ambas as plantas, a de aluminio e a de alúmina, e que mesmo expón a instalación dunha planta de coxeración eléctrica para fornecer enerxía propia á fábrica, o que a maiores xeraría novos postos de traballo.

Este mércores, 4 de agosto, remata o período de consultas do ERE. “Mañá traballaremos con moitas propostas, a primeira posibilidade e solución é a venda”, remarcou.

AUXILIARES

No tocante ás auxiliares, segundo expuxo o coordinador da plataforma que aglutina a representación sindical das contratistas, Kike Rocha, GFG Alliance asegurou que por agora non pode facer unha valoración sobre o emprego pois carece da información suficiente.

En todo caso, os sindicatos das contratistas valoraron o proxecto proposto. “Temos que ser cautos e porque este tipo de cuestións débense explicitar por escrito, pero cremos que hai vontade de producir aluminio e neste caso témolo claro; pensamos que Alcoa quere marchar e nós temos que ir con quen quere manter esta planta”.

RESPOSTAR

Please enter your comment!
Please enter your name here