A prórroga do período de consultas, un balón de osíxeno para os traballadores das auxiliares

Os obreiros das contratistas temían ser os primeiros en caer de asinarse un Erte; non participarán na fiscalización do proceso de venda aínda que tamén lles afectan os plans do posible comprador

Traballadores das auxiliares, con casco branco, nunha manifestación en Viveiro. JUAN MAYA

Se para os traballadores de Alcoa San Cibrao foi un respiro o tempo de seis semanas gañado para que a multinacional negocie con Liberty House a venda da planta de aluminio de San Cibrao, sobre a que planea un Expediente de Regulación de Emprego (ERE) que suporía máis de 900 despedimentos entre obreiros da factoría e das contratistas, son precisamente os operarios das empresas auxiliares quenes máis aire recibiron. Estes empregados, sen vinculación contractual coa titular pero dependentes das decisións da mesma, consideran que serían os primeiros en caer de executarse o despedimento colectivo e tamén no caso de que non haxa venda, se finalmente se asina un Expediente de Regulación Temporal de Emprego (Erte) como pretende a propietaria. Á singularidade da súa situación engádense a dúbida sobre o plans que para eles teña a potencial compradora das instalacións.

A prórroga do período de consultas do ERE supón para o persoal da industria auxiliar “un raio de esperanza. Ver que hai unha empresa que quere mercar a planta cando outra a pretende pechar é algo positivo”, expón o voceiro da coordinadora da representación sindical nas empresas contratistas, Kike Rocha, que con todo amósase cauto sobre unha posible venda. “Que se concrete é o primeiro”, remarca.

Rocha entende que asinar a suspensión dos contratos ata 2022 que pretendía Alcoa supuña a condena dos traballadores das auxiliares. “Un Erte na principal suporía un ERE en boa parte das contratistas –ata dez de arredor dunha trintena de empresas teñen o 100% dos seus contratos na planta de aluminio-“, salienta. “Ao rematar os acordos en vigor, veríanse abocadas ao peche, polo que seriamos despedidos”, remarca.

VIXILANTES SOBRE O PLAN DO POTENCIAL INVESTIDOR

Ao igual que sucedeu nas conversas do ERE, cando os empregados das contratistas quedaron desamparados ao non ter vínculo contractual con Alcoa, e polo tanto, carecer de representantes nas negociacións máis que como asesores, durante a fiscalización do proceso de venda, para a que se constituirá unha mesa multilateral, os traballadores das auxiliares tampouco terán unha presenza directa nas reunións, posto que as súas fundas levan outros nomes.

Deste xeito, hai incerteza sobre “as ideas que terá a compañía sobre as auxiliares. Nós sabemos que facemos un traballo fundamental dentro da planta, pero non que plans teñen para nós; se quererán o 100% do persoal, se pretenderán recortes. Temos que mirar que quere facer a compradora e tamén que di a lei sobre os contratos en vigor, porque igual si que a normativa nos dá palabras, no tocante á posibilidade de que haxa pactos vinculantes”.

FOLGA

Outro dos exemplos que amosa a situación singular das auxiliares é que, mentres que o comité de empresa de Alcoa desconvocou a folga indefinida polo compromiso adquirido coa multinacional para respectar a paz social mentres dure o proceso de venda, é que serán as contratistas as que deciden se levantan o paro emprendido, unha decisión que segundo Rocha tomarán nos vindeiros días.

RESPOSTAR

Please enter your comment!
Please enter your name here