O presidente do comité de empresa da planta de aluminio de Alcoa en San Cibrao, José Antonio Zan, acusou este luns á dirección da multinacional americana de pór “todas as trabas posibles” á venda da factoría á británica Liberty. Dúas semanas despois desde que se abrira o período de negociacións entre ambas as sociedades, e a un mes de que finalicen os contactos, Zan apuntou que aínda que se trata dun diálogo entre dous “particulares”, os traballadores “non poden saber os pormenores”.
Sobre as negociacións para a venda da planta situada no municipio lucense de Cervo, sinalou que “se supón que o que vende quererá vender caro e o que compra quererá comprar barato”. Así, o presidente do comité precisa que “este non é o problema”, senón que Alcoa “ten que darse conta que está a xogar coa vida de moita xente e está a tentar meter medo“.
OS SINDICATOS: “NON SE PODE UTILIZAR AOS OBREIROS E METER MEDO”
“Queda un mes de negociación, e non pode utilizar á xente e aos traballadores para sacar un pouco máis de diñeiro ou de rédito”, afeou o sindicalista de CC. OO. Neste sentido, Zan quixo deixar claro que “non se pode pór de escusa” que a operación por parte de Liberty “non é viable”, cando “é unha empresa que negociou en todos os continentes e comprou empresas en todo o mundo”.
Finalmente, Zan lembrou que foi a compañía británica a que impuxo o prazo de seis semanas. “Hai que deixar de pór escusas e porse a negociar”, apremou. O pasado venres, xornada na que a mesa multilateral abordou este proceso de venda de San Cibrao, Alcoa lamentou que GFG Alliance, do grupo Liberty, non presentou “ningún plan industrial que indique como garantirán a viabilidade a longo prazo da planta, incluída unha solución enerxética”.
MÁIS DE 900 EMPREGOS EN XOGO
De non concretarse unha venda antes do 28 de setembro, ese mesmo día Alcoa e sindicatos retomarían na última xornada o período de consultas do Expediente de Regulación de Emprego (ERE) presentado pola titular na planta de aluminio, que suporía o despedimento de 534 traballadores na fábrica e outros 400 na industria auxiliar de San Cibrao.
