Viveiro acolleu a cuarta Interfederativa de Confrarías do Cantábrico Noroeste, que reuniu ás sete agrupacións de pósitos do caladoiro.

O xoves celebrouse unha xornada de traballo na que os dirixentes das confrarías puxeron en común as súas valoracións de temas como os descartes, medidas técnicas, o regulamento de control ou o plan de xestión do caladoiro.

O venres, o sector pesqueiro puido presentar as súas preguntas e reivindicacións a representantes das administracións. Acudiron ao encontro a secretaria xeral de pesca do Ministerio de Agricultura, Pesca e Alimentación, Alicia Villauriz, e Mercedes Rodríguez Moreda, directora xeral de pesca da Xunta de Galicia, entre outras autoridades.

MULTAS

As confrarías insistiron na revisión da catalogación das sancións que poden obrigar á devolución das axudas recibidas do Fondo Marítimo Pesqueiro, unha demanda xa plantexada noutras ocasións. Neste senso, plantexaron a posibilidade de compensar a multa de cabala con cota de bocarte.

RAIA E SARDIÑA

Os problemas derivados da xestión da raia ou da sardiña e a incidencia dos arrastreiros peláxicos irlandeses e franceses que condicionan a costeira do bonito foron algúns dos temas destacados.

MINIMIS

Tamén se preguntou sobre o criterio que se aplicará para delimitar a especie principal para a pesquería multiespecífica, á hora de computar o 1% de minimis.

DATOS DE PESCA

No tocante ao regulamento de control, unha das preocupacións do sector é a implantación dun sistema de comunicación electrónica de datos de captura para as embarcacións que non teñen esa obriga na actualidade. 4INTERFEDERATIVA_CONCLUSIONES2018+