O comité europeo de Alcoa confirmou este luns que iniciou os trámites para demandar á multinacional do aluminio ao entender que a empresa “incumpriu a normativa” ao “non abrir un período de consultas preceptivo” ao anuncio de peche das fábricas de Avilés e A Coruña.
Os representantes dos traballadores presentaron un paquete de “alternativas” á empresa para evitar os peches das fábricas e ofrecéronlle á directiva un prazo para “dar marcha atrás na súa actitude”.
O prazo rematou este luns sen que houbese “unha rectificación”, segundo expón o presidente do comité europeo, José Luis Combarro. Por iso, o sindicalista asegura que “imos levar este conflito aos tribunais holandeses“.
“A empresa segue adiante cos despedimentos e a nós comunicounos un feito, e non unha intención. Non houbo un proceso de información e consultas, como establece o regulamento, senón un plantexamento pechado”, explica.
“TEMOS POUCO TEMPO”
Combarro sinala que axilizarán ao máximo a tramitación da denuncia e agarda que a xustiza holandesa sexa “rápida, porque temos pouco tempo“.
O sindicalista espera que os tribunais atendan a demanda antes de que expire o período de consultas de trinta días convocado pola multinacional, que comeza o vindeiro mércores, 31 de outubro.
A FÁBRICA DE ITALIA, “EXEMPLO”
Combarro expón que ao longo das negociacións insistirán en que “hai solucións” alternativas aos despedimentos colectivos. O presidente do comité pon como exemplo “a fábrica de Italia, que pechou hai cinco anos. Unha empresa comprou esa factoría, vai facer un investimento importante e van retomar o traballo no 2020“.
MARCHA DOS TRABALLADORES DA CORUÑA
Por outra banda, os traballadores de Alcoa na Coruña manifestáronse na tarde deste luns contra o peche das fábricas.
Os obreiros marcharon en roupa de traballo desde a planta coruñesa ata a delegación do Goberno central. Unhas mil persoas participaron na marcha para esixir á multinacional que reconsidere o peche das fabriñas coruñesa e avilesina, que empregan a 317 e 369 persoas, respectivamente.
Os manifestantes reivindicaron “unha solución ao problema enerxético” como chave para desbloquear o conflito laboral.
