InicioEconomíaO comité valora o "abafador si" que deixa vía libre para unha...

O comité valora o “abafador si” que deixa vía libre para unha venda: “queda nas mans da SEPI e de Alcoa”

Os sindicatos agardan que as negociacións para o traspaso da planta de aluminio comecen "a semana que vén"

Publicada o

- Advertisement -

Ramón González Rey/EFE. A aprobación por parte dos traballadores do preacordo asinado entre Alcoa e o comité de empresa de San Cibrao despexa o camiño para que a multinacional e o Goberno de España, a través da Sociedade Estatal de Participacións Industriais (SEPI), reinicien as negociacións para a venda da planta de aluminio primario.

A “paz social” era a condición esixida pola multinacional para reiniciar esas negociacións, cuxo propósito último sería a adquisición da planta por parte da SEPI para a súa posterior venda ao grupo Liberty House, interesado en facerse con ela.

REVELA QUE XA HOUBO UNHA PRIMEIRA APROXIMACIÓN

De feito, fontes consultadas por EFE informaron de que o Goberno de España xa tentou unha primeira aproximación coa multinacional esta semana, pero Alcoa optou por aprazar calquera reunión ata que os traballadores do complexo industrial ratificasen o preacordo para levantar a folga indefinida.

Este mediodía, o comité de empresa informou de que os traballadores do persoal do complexo industrial de San Cibrao aprobaron, co 87,2% dos votos a favor, o preacordo ao que chegou a representación social coa dirección da multinacional para levantar ese paro e reiniciar as negociacións para a venda da planta de aluminio primario á SEPI, logo de tres días de votacións.

A folga indefinida, que comezou a principios de outubro, provocou, segundo cálculos da multinacional, máis de dez millóns de euros en perdas.

“Despois do abafador resultado a favor do si, con case o 90% dos votos”, dixo o presidente do comité, José Antonio Zan (CC. OO.), a representación social xa mantivo unha “reunión coa dirección da empresa” para asinar esa “paz social”.

A FOLGA DESCONVOCARASE COA SINATURA DO ACORDO, QUE INCLÚE A INCORPORACIÓN DE 40 TEMPOREIROS

“Cando teñamos o acordo asinado por ambas partes”, aclarou, poderá comezar “a contratación dos traballadores temporais” necesarios “para o funcionamento diario” da planta e a incorporación como indefinidos daqueles que cumpran os requisitos do acordo alcanzado en 2019.

Ademais, o comité de empresa de Alcoa San Cibrao confía en que, unha vez que os traballadores da planta ratificaron o acordo alcanzado coa dirección da multinacional, as negociacións entre a compañía e a SEPI para a venda da planta de aluminio primario comecen xa a semana que vén.

O PERSOAL RESALTA QUE COA SINATURA DO PACTO “DESBLOQUEAMOS A SITUACIÓN”

En declaracións a EFE, Zan considera que ese acordo entre a representación social e a multinacional “desbloquea a situación“, de modo que “daquela pouco poderemos ter esa primeira mesa” de negociación, que podería “empezar a funcionar a semana que vén”.

“Agora todo queda en mans de Alcoa e da SEPI, que teñen que negociar para chegar a bo porto, como non pode ser doutra de forma”, engadiu o presidente do comité.

De feito, recordou que o propio presidente da multinacional “xa se abriu onte publicamente” e “ante os accionistas” da empresa “a negociar esa venda” da planta de aluminio primario de San Cibrao “á SEPI”.

“Esperamos que esa negociación dea os seus froitos e permita chegar a un acordo xeral. Despois quedarían pequenos acordos e a visita á planta”, por parte do posible comprador, “para levar a cabo a venda”, concretou.

A CIG APUNTA AOS GOBERNOS DO ESTADO E A XUNTA: “ESPERAMOS QUE NON DESAPROVEITEN A SITUACIÓN”

A CIG, que se mostrou crítica co pacto, insistiu en que malia “non compartir” as condicións do mesmo “asumirá” o resultado, cunha “ampla maioría. Esperamos que este acordo abra unha vía de negociación que sirva para acadar unha solución e garantir os postos de traballo tanto no complexo industrial como nas auxiliares”, expuxo.

O sindicato nacionalista apuntou aos Gobernos do Estado e da Xunta: “esperamos que non desaproveiten esta situación”. E lamentou de novo que “non se deixase votar aos compañeiros de auxiliares“, cando “todos somos un”.

UGT CONSIDERA “FUNDAMENTAL” O PACTO ANTE “A POSIBLE PERDA DUN FUTURO COMPRADOR”

Pola súa banda, a UGT emitiu un comunicado no que se felicita pola resposta afirmativa ao acordo, cunha “ampla maioría“, dado que o sindicato “considera fundamental desbloquear a situación e explorar vías de solución canto antes, ante a posible perda dun futuro comprador“.

A SUBDELEGADA DO GOBERNO AGRADECE A “RESPONSABILIDADE” DOS OBREIROS

A subdelegada do Goberno, Isabel Rodríguez, felicítase polo apoio dado polos traballadores de Alcoa ao preacordo que permitirá retomar as negociacións para a venda da fábrica.

“Co seu respaldo maioritario ao preacordo para levantar a folga e retomar as negociacións, os traballadores facilitan o comezo do diálogo para a venda da planta e fan unha demostración de responsabilidade na loita polo mantemento da empresa e os postos de traballo, tan importantes para a comarca da Mariña”, destacou.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...