O Concello ten aberto o prazo de solicitude de subvencións por concorrencia competitiva para as asociacións culturais. A concelleira de Cultura, Pilar Otero, dixo que ao igual que outras áreas do Concello, tamén a Concellaría de Cultura “abriu a posibilidade de que as entidades inscritas no rexistro de asociacións soliciten unha axuda para o financiamento de actividades culturais que organizasen neste 2021”.
Otero Cabarcos lembrou que son subvencións de concorrencia competitiva, pois tamén as hai nominativas, é dicir que o importe reservado neste caso (3.600 euros) se repartirá entre as que se presenten e segundo o baremo que figura nas bases. Esta información, que inclúe tamén os modelos a cubrir, está no taboleiro de anuncios da sede electrónica do Concello de Ribadeo. E tamén se pode solicitar na oficina de Cultura, na casa do Viejo Pancho.
A edil ribadense indicou que o anuncio no BOP xa se publicara o 7 de decembro e hai 15 días naturais para presentar a solicitude. “Sabemos que as axudas mediante subvención posibilitan as programacións de actividades das diferentes entidades e con isto apóiase a interacción social e cultural da veciñanza” destacou Otero.
Desta maneira o Concello está actualizando as subvencións pendentes de anos anteriores que se foran atrasando e “de feito moitas asociacións veciñais e culturais xa foron vendo nestas últimas semanas como se foi ingresando cada un dos importes concedidos, sumando en total polo momento máis de 46.000 euros”.
