Os traballadores de Alcoa aceptan en referendo a proposta de parar dous anos as cubas

O comité avisa que "seguen ameazados os postos de traballo e a continuidade" da planta de aluminio.


Os traballadores de Alcoa en San Cibrao aprobaron en referendo o acordo para poder iniciar o proceso de cesamento de produción de aluminio primario e posterior rearranque segundo as condicións descritas na proposta que trasladou a multinacional.

Os resultados da votación, difundidos polo comité de empresa á primeira hora da madrugada deste mércores, sitúan no 69,68% os apoios ao si entre o persoal, cuxa participación alcanzou o 76%, de 1.063 traballadores censados.

Así, dun total de 808 votos emitidos, o reconto arroxou 563 votos a favor (ese 69,68%), 196 votos en contra (24,26%), 40 votos en branco (4,95%) e nove votos nulos (1,11%). Mentres, o resultado do referendo nas empresas contratistas foi desfavorable para o acordo, con 180 votos emitidos: 54 a favor (30%), 105 en contra (58,3%) e 21 en branco (11,7%).

Por tanto, o comité dá por aprobado o acordo para iniciar o cesamento da produción, unha proposta para dar solución ao conflito polo que, advirte, “seguen ameazados os postos de traballo e a continuidade” da planta de aluminio.

NEGOCIACIÓN

O pasado xoves 23 de decembro finalizou sen acordo a negociación entre Alcoa e o comité da fábrica de San Cibrao tras catro xornadas maratonianas en Santiago. Foi entón cando os representantes dos traballadores anunciaron que someterían a referendo a última proposta da compañía.

De feito, a empresa lanzara na véspera (o mércores 22) un ultimato ao comité de empresa no que fixou este martes 28 de decembro como data límite –ás 14,00 horas– para que o acordo estivese asinado.

A última oferta da compañía pasa por un investimento de 103 millóns de dólares (máis de 90 millóns de euros ao cambio) para “a viabilidade futura e crecemento da planta”, incluído o reinicio das cubas de electrólises en 2024 tras unha parada de dous anos, e como garantía constituirase un depósito restrinxido pola mesma contía.

De acordo con ela, Alcoa comprométese a traballar con oito subministradores de enerxía cos que xa está en contacto, para alcanzar acordos a medio e longo prazo (PPAs), que entrarían en vigor a partir do 2024 e terían unha vixencia a 10 anos.

Accede ao seguimento destas negociacións, así como dos investimentos e a evolución do acordo, a través dunha mesa na que estarían presentes o comité (dous membros por sindicato), Xunta e Goberno, cunha frecuencia mensual o seis primeiros meses e trimestral de aí en diante.

En canto ao plan para os anos 2022 e 2023, Alcoa ofrece garantía de facturación das empresas auxiliares durante os dous primeiros anos, con contratos garantidos a tres anos (2022 a 2024) daquelas empresas externas directamente afectadas o cesamento temporal. Ademais, haberá preferencia de contratación para as empresas de subministracións e transportistas locais.

No tocante a investimentos nos dous primeiros anos, figuran uns 37 millóns de euros para actuacións como a reconstrución de forno de cocción para ánodo grande; ao que se unen máis de 5 millóns para un transformador novo (TRG) con ajustador de tensión, deseñado para 200.000 amperios; e un forno de homoxeneizado (2,6 millóns). Hai 31 millóns reservados para o rearranque das cubas nun proceso de seis meses a partir de 2024.

Igualmente, seguirá operativa a actividade en fundición e a planta de alúmina, cun plan comercial durante estes anos, a razón de 65.000 toneladas anuais de tocho e previsión de venda de 25.000 toneladas anuais de placa. Os compromisos cos clientes non se verían afectados.

QUE SE LEVANTE A FOLGA

Este acordo inclúe a condición de que os traballadores levanten a folga e comprométanse á paz social durante a súa vixencia. Na planta de aluminio non se acometerán expedientes de despedimento colectivo (nin ERE nin ERTE), durante catro anos, ata o 31 de decembro de 2025.

Así, os traballadores afectados seguirán o seu calendario habitual. A dirección de planta indicará as tarefas a realizar, incluíndo formación, substitucións ou actividades de mantemento e limpeza de instalacións. En caso de ausencia de traballo, facilitarase permiso retribuído polo período correspondente.

A partir do 1 de xaneiro de 2025, derivado da formación e execución de investimentos, realizaranse as revisións daqueles postos que así o requiran. Ademais, faranse os contratos directos a data de 1 de xaneiro de 2023 de todos aqueles empregos temporais que, durante o ano 2021, tivesen un contrato de posta a disposición.

Pola súa banda, haberá un convenio con vixencia de seis anos, do 2020 ao 2025. Entre outras cuestións, recolle un incremento salarial do 2% anual, tanto en táboas como axudas, pero sen cláusula de revisión do IPC.

RESPOSTAR

Please enter your comment!
Please enter your name here