InicioEconomíaSan Cibrao irá á folga contra o peche das plantas de Alcoa,...

San Cibrao irá á folga contra o peche das plantas de Alcoa, que leva 400 MW da poxa

O paro, de 6.00 a 22.00 horas, coincidirá cos convocados polas plantas de Avilés e A Coruña

Publicada o

- Advertisement -

Os traballadores da planta de Alcoa en San Cibrao decidiron de forma unánime nunha asemblea celebrada este xoves que irán á folga o vindeiro mércores 19 de decembro.

O paro, ao que están chamados arredor de 1.200 traballadores, coincidirá cos convocados polos obreiros das fábricas da multinacional na Coruña e Avilés, que negocian un ERE de extinción presentado pola firma.

A folga será de 6.00 a 22.00 horas, de forma que abarcará as quendas de mañá, tarde e o ordinario. Os traballadores continuarán este venres a negociar os servizos mínimos do paro.

Os traballadores reivindicarán co paro a consecución dunha tarifa eléctrica que “dea viabilidade á industria electrointensiva“, que se desenvolva o decreto lei que vén de aprobar o Goberno central e que a empresa retire o ERE extintivo que pesa sobre as fábricas da Grela e Asturias.

“Por un lado, queremos que o Goberno actúe e que o decreto-lei aprobado sexa máis que unha declaración de intencións. Se non o fai, San Cibrao tamén terá axiña sobre dela a espada de Damócles“, indica Xosé Paleo, o presidente do comité de empresa sancibrense.

Por outra banda, os obreiros son conscientes de que Avilés e A Coruña “non teñen tempo“, polo que instan a Alcoa a que “levante o ERE e dialogue“, indica Paleo.

CONCENTRACIÓN EN VEGADEO

O mesmo día 19, os obreiros de Avilés e A Coruña farán marchas -desde Castropol e Ribadeo, respectivamente- cara Vegadeo, onde se unirán para clamar contra o peche das fábricas, que suporía o despedimento duns 700 traballadores.

os obreiros da planta cervense participarán nas protestas cos seus compañeiros da coruña e avilés

Os traballadores da planta cervense confirmaron que asistirán á protesta, aínda que polo de agora barallan se esperar aos seus compañeiros na Veiga ou se acompañalos desde Ribadeo.

SUBASTA

Respecto á poxa de electricidade celebrada ao longo desta semana, a multinacional do aluminio obtivo 10 dos 21 bloques de 40 MW subastados, a un prezo medio de 105.429 euros/MW ano.

O xornal Cinco Días adiantou esta información, que fontes da compañía confirman. Así, a empresa acadou un total de 21 millóns de euros para o período comprendido entre o 1 de xaneiro e o 30 de xuño.

A maioría deses bloques (seis) será asignada á fábrica de San Cibrao, mentres que Avilés e A Coruña quedarán cos outros catro, a partes iguais.

a empresa fíxose con 10 bloques de 40 mw na poxa de potencia interrumpible e fai un balance negativo da subasta

Fontes da empresa sinalan que “a subasta proporcionou un valor moi inferior ao de anos pasados e Alcoa terá que avaliar o impacto desta redución, que previsiblemente danará a competitividade das plantas polos custos da electricidade”.

Respecto do paquete de medidas aprobadas polo Goberno, entre elas a da creación dun estatuto do consumidor electrointensivo, a firma “está a analizar a nova normativa” e cre que o seu éxito “dependerá do seu desenvolvemento, polo que é cedo para sacar conclusións”.

Os traballadores de San Cibrao pedirán explicacións sobre os resultados da poxa, que remata este venres, ao director da planta e presidente da multinacional en España, Rubén Bartolomé.

Con todo, saben da dificultade de pechar un encontro ao sucederse en Madrid, cada martes e xoves, as negociacións do ERE extintivo.

“VALOR INFERIOR NO 40% AO DO 2017”

Polo de agora, Paleo asegura que a poxa foi “un desastre” e que Alcoa só foi capaz de acadar un valor “un 40% inferior” ao da subasta do pasado ano, que xa fora considerada negativa en comparación cos resultados de 2016.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...