O goberno local de Mondoñedo vén de aprobar as bases reguladoras e a convocatoria da fase XVI das subvencións para a rexeneración e renovación urbá na Área de Rehabilitación Integral (Ari) do casco histórico mindoniense e dos barrios históricos de San Lázaro e Os Muíños.
As bases teñen por obxecto regular a concesión das subvencións destinadas a financiar os gastos derivados das actuacións de rexeneración e renovación urbá na zona. As achegas destinadas a estas axudas superan os 207.000 euros.
O Ministerio de Fomento custeará algo máis de 152.300 euros, mentres que a Xunta de Galicia financiará as obras con 55.500, aproximadamente.
A contía das subvencións será do 40% do custo das actuacións subvencionables. A cantidade máxima das axudas será a establecida no artigo 29.2 do Real decreto 106/2018.
Os interesados poderán presentar as súas solicitudes no rexistro do consistorio ou por calquera dos medios previstos no artigo 16 da Lei 39/2015 de procedemento administrativo común das administracións públicas.
Poderán tramitarse dende o día seguinte á publicación destas bases no Boletín Oficial da Provincia (BOP) até o prazo de finalización do convenio ou ata a fin do financiamento.
Poderanse acollerse ás axudas as actuacións iniciadas con posterioridade a 1 de xaneiro do ano da convocatoria en curso, pero que non estean finalizadas á data da presentación das solicitudes por parte dos interesado no período establecido ao efecto.
ASESORAMENTO
Os interesados terán a opción de solicitar unha visita de inspección técnica previa á solicitude oficial das axudas, co fin de asesoramento. Os técnicos da oficina de rehabilitación municipal comprobarán o estado da edificación e aconsellarán ao particular sobre as posibilidades de mellora e rehabilitación dos inmobles.
OBRIGAS DOS BENEFICIARIOS
As obras deberán executarse no prazo máximo establecido na cualificación provisional das axudas, é en todo caso deberán estar rematadas antes do fin da vixencia do Plan Vivenda 2018-2021.
A concesión de subvencións será en réxime de concorrencia non competitiva, mentres que a selección de beneficiarios será por orde de entrada en calquera dos medios legais dispoñibles para a entrega de documentación na administración pública que conte cun rexistro de entrada con data e hora.
Segundo expón o Concello, terán preferencia aquelas solicitudes que presenten de forma completa a documentación esixible.
