O Goberno central prevé rematar “no mes de agosto” as obras que leva a cabo o Ministerio para a Transición Ecolóxica de acondicionamento da contorna do Portiño de Morás, no concello de Xove.

A subdelegada do Executivo, Isabel Rodríguez, o alcalde, Demetrio Salgueiro, e o xefe provincial de Costas, José Miguel Estevan, visitaron o pasado mércores as actuacións.

Os labores pendentes consisten na instalación dunhas varandas, a colocación de cartelería explicativa da actuación e tamén no sementado de céspede con terra vexetal.

SINGULARIDADE “PAISAXÍSTICA E HISTÓRICA”

Rodríguez asegurou que o Ministerio para a Transición Ecolóxica desenvolve este proxecto “coa finalidade de recuperar para o uso e disfrute de veciños e visitantes unha zona de gran singularidade paisaxística e histórica do concello de Xove”.

O proxecto de recuperación ambiental tamén se aproveitará para lembrar o importante pasado industrial da zona.

Na contorna desenvolvéronse actividades relacionadas coa caza e comercialización de baleas e fabricáronse os dolos, as grandes pezas de formigón que se empregaron, ensamblándoas unhas a outras, para a construción dos espigóns do porto de Alcoa.

PASADO INDUSTRIAL

Precisamente, unha das actuacións máis chamativas deste proxecto consistiu na recuperación de oito dos numerosos dolos que foran abandonados, no seu día, nas inmediacións. Quedaron instalados a modo de recordatorio na mesma zona na que, por aquel entón, se fabricaban estas pezas.

Segundo expón o Executivo, esta foi unha das actuacións máis complicadas do proxecto xa que as 53 toneladas de peso de cada un dos dolos obrigou, para poder mobilizalos, a contar con dúas grúas móbiles autopropulsadas de gran tonelaxe, de 130 toneladas cada unha, ademais dunha cabeza tratora con plataforma.

PASEO PEONIL

Este proxecto medioambiental e etnográfico inclúe outras actuacións como a creación dun paseo peonil, o soterramento de todo o cableado de electricidade e telefonía e o acondicionamento do acceso á praia.

O paseo peonil, de madeira e dotado con mobiliario urbano, aproveita o antigo trazado da estrada, que foi desprazado cara o interior para alonxar o tráfico rodado da zona máis próxima á costa.

INVESTIMENTO DE 360.000 EUROS

O investimento alcanza os 360.000 euros. As obras comezaron en decembro pasado e a execución foille encomendada á empresa pública Tragsa.