A Asociación de Comerciantes, Industriais e Autónomos de Mondoñedo (Aciam), en colaboración co Concello e a Xunta de Galicia, iniciaron a campaña ‘Di non ao plástico’, para fomentar a conciencia medioambiental sobre o uso de bolsas deste material non biodegradable e a necesidade de reducir o seu consumo.
A través desta iniciativa, os establecementos asociados á Aciam repartirán bolsas reutilizables aos seus clientes para deste xeito implicar á sociedade na loita contra hábitos que afectan á natureza e ao medio ambiente, xa que “menos bolsas, significan máis vida”, argumentan.
Segundo o Real Decreto 29/2018 de 18 de maio sobre a redución do consumo de bolsas de plástico, é obrigatorio cobrar polas bolsas de plástico dende xullo de 2018.
Dende o 1 de xaneiro de 2020 prohibiranse as bolsas de plástico fragmentado e as grosas deben conter un 50% de material reciclado. A partir do 2021 só se poderán comercializar aquelas que sexa compostables. “É necesario aportar aos clientes bolsas de outros materiais biodegradables”, expoñen desde a Aciam.
FOMENTO DO COMERCIO LOCAL
Ángel Marful, presidente do colectivo, e Elena Candia, a alcaldesa, presentaron a campaña, que tamén procura que se merque nos establecementos locais xa que, tal e como aparece rotulado nas bolsas reutilizables que se repartirán entre os clientes, “comprándolle ao teu veciño, medra o teu pobo”.
As bolsas de distintas cores identifican aos clientes do comercio local e contribúen a construír unha imaxe de marca de Mondoñedo.
