InicioM.ambiente e Patrimonio"A ánfora achada en Ribadeo amosa que o seu porto leva funcionando...

“A ánfora achada en Ribadeo amosa que o seu porto leva funcionando como tal case 3.000 anos”

Miguel San Claudio, arqueólogo submariño, cre que o achádego demostra "que houbo navegación atlántica e importacións de bens a través do mar moito antes de Roma"

Publicada o

- Advertisement -

EFE. O arqueólogo e submarinista Miguel San Claudio está inmerso na procura de vestixios de máis de 3.000 anos de antigüidade nas costas galegas onde asegura que hai “moitísimos restos e moi importantes” que explican a súa historia e a doutros puntos de Europa.

San Claudio (A Coruña, 1964), doutor en Arqueoloxía Submariña, está habituado a traballar en proxectos subacuáticos complexos sobre todo nun mar “tan bravo” como o galego, explica nunha entrevista con Efe.

“Cando comecei a facer arqueoloxía subacuática en Galicia había xente que dicía que non se podía conservar nada nun mar tan bravo, pero xa demostramos que si”, enfatiza.

UN RECIPIENTE CERÁMICO DE ORIXE GREGA E DO SÉCULO VI A. C.

Entre os vestixios máis valiosos para el figura un ánfora de orixe grega, que data do século VI antes de Cristo, achada no porto de Ribadeo, que “leva funcionando como tal case 3.000 anos“, sostén.

“Iso foi un achado interesante que demostra a navegación atlántica moito antes de Roma e a importación de bens de consumo a través do mar“, explica San Claudio, con 20 anos de experiencia en investigación do Patrimonio Cultural Submariño.

O GALEÓN, EN PROCESO DE ESTUDO

Tamén o foi atopar un galeón en “incrible bo estado, grande e poderoso” en Ribadeo, que está en proceso de estudo, ou outros afundidos na contorna de Finisterre.

Entre outros restos de importancia cita un cepo de ancora romana atopado no porto da Coruña, o que explicaría a navegación en época romana desde o porto da torre herculina.

“Estamos aos poucos desentrañando as brumas que nos oculta ese pasado. Fronte ás costas galegas pasou toda a historia europea dos últimos tres mil anos, sendo conservadores”, apostila.

“FALTA ESTABILIDADE PARA AS INVESTIGACIÓNS CIENTÍFICAS”

Aínda que recoñece que aínda non atoparon restos materiais, San Claudio móstrase convencido de que “seguro que houbo navegación moito antes pero aínda non os atopamos, estamos traballando e avanzando, non todo o rápido que quixésemos porque non dispoñemos de medios, facemos o que podemos”.

O arqueólogo defende o establecemento dunha estrutura estable que permita a investigación do patrimonial cultural subacuático en Galicia, porque asegura: “traballamos moitas veces de xeito voluntarista e con escasos medios ao compás de escasas obras públicas“.

Ao seu xuízo, “falta a estabilidade que permita realizar unha investigación científica con proxectos, desenvolvemento e resultados, e para iso necesítase algo que a Administración asinou en 2011 que ía facer, que era un centro de arqueoloxía subacuática en Galicia”.

SOBRE O MEDIOAMBIENTE: “HAI MOITO ALARMISMO”

San Claudio é un dos protagonistas do Festival Mar de Mares que se celebra esta semana na Coruña, onde asegura que “hai moito alarmismo” sobre a situación dos mares e “hai xente que saca partido dese exceso”.

Aínda que subliña a necesidade imperiosa de seguir coidando o medioambiente, non cre que “a situación do mar sexa cada vez peor, polo menos en Europa”, e apostila: “coñecino moito peor”.

Así, subliña que en Galicia prácticamente xa non se verten augas residuais a ríos e ao mar e o lixo está moito máis controlado.

“Hoxe en día hai máis precaución, limítanse os vertidos de barcos, penso que estamos moito mellor que cando eu coñecín o mar de neno”, cando os barcos achicaban as sentinas e lanzaban residuos de aceite ou restos de combustible “sen ningún pudor ao mar”, engade.

Nas praias había lixo e era habitual mancharse de chapapote, “iso ocorríanos a todos”, observa, e “non é unha situación comparable á de agora”, porque iso xa non sucede e “todo mellorou moitísimo”.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...