O proxecto ‘O Costal’, proxecto referente en Galicia en conservación, recuperación paisaxística e desenvolvemento rural, asinou un acordo de colaboración co Centro de Formación e Experimentación Agroforestal ‘Pedro Murias’, para que alumnos e profesores do Ciclo medio de Conservación do Medio Natural realicen prácticas no proxecto.
O enclave ‘O Costal’ atópase nun lugar destacado de Ribadeo. Son 23 hectáreas que se sitúan á beira da súa ría contigua á costa durante 1,7 quilómetros ao sur. ‘O Costal’ era unha leira abandonada, invadida por especies invasivas, pero grazas a un proxecto de recuperación paisaxística e ambiental dun empresario privado converteuse, remarca nun comunicado, en “referente” en Galicia.
Este traballo de recuperación, que comezou en 2014, é unha “aposta pola restauración ambiental, con escala suficiente para proporcionar beneficios significativos no ámbito social, económico e ambiental”, afirma Carmela Moral, de Orza Paisajismo, directora do proxecto.
No social, subliña que “mellora a calidade de vida e a paisaxe cotiá” da poboación de Ribadeo, o que fai que sexa un proxecto “coñecido e valorado”. Non en balde, proporciona “as vistas dunha coidada paisaxe desde diferentes puntos da súa contorna” e, en particular, ao longo da senda costeira que se estende desde a localidade cara ao sur e que limita co Costal.
No aspecto económico, trabállase con empresas locais, unha aposta que comezou en 2016 e que “asegura o seu traballo no futuro”.
POSTOS DE TRABALLO
Pero tan importante como todo o anterior é que O Costal necesita mantemento constante para o coidado da leira e a granxa, “o que proporciona 3,5 postos de traballo a tempo completo”.
Ademais, a restauración ambiental implica un incremento importante da biodiversidade e os beneficios que esta proporciona, xa que repercute na Rede Natura 2000 e zonas de especial protección para aves ( ZEPA).
HÁBITATS PARA AVES, FAUNA E FLORA AUTÓCTONA
Ao comezo do proxecto, a leira estaba colonizada maiormente por arboreda e plantas de carácter invasor e tamén eucaliptos, estratos con poucos beneficios ambientais pola súa baixa taxa de biodiversidade. Con esta rehabilitación, están a crearse hábitats para aves, fauna e flora autóctona.
“Plantáronse ata o momento 5.600 árbores de 144 especies e 15.300 plantas de 160 especies, usando principalmente vexetación autóctona e adaptada ás condicións costeiras”, destaca Moral. Ademais, o 60% da superficie destínase a produción para a granxa, que conta actualmente con 100 ovellas, mentres que a superficie restante ten como fin principal a recuperación de espazos naturais.
ACORDO
‘O Costal’ chegou a un acordo co Centro de Formación e Experimentación Agroforestal ‘Pedro Murias’, situado no concello de Ribadeo e dependente da Axencia Galega de Calidade Alimentaria. Este centro de formación é un dos seis que a Xunta ten no territorio e que son referencia en formación e transferencia tecnolóxica.
Grazas a este acordo, alumnos e profesores do Ciclo medio de Conservación do Medio Natural acaban de comezar as súas prácticas no proxecto, realizando traballos de tratamento silvícola, como a poda de formación ou a roza, o que lles permitirá aplicar os coñecementos adquiridos nas aulas. Este ciclo integra a formación profesional de grao medio na modalidade dual.
Esta metodoloxía considérase punteira porque permite aos alumnos ter contacto co mundo laboral desde o comezo da formación. Desa forma, favorécese a capacitación dos alumnos e un mellor e máis rápido acceso ao mercado laboral.
O Centro ‘Pedro Murias’, presente na vida de Ribadeo desde 1913, está orientado, principalmente, á capacitación dos agricultores e gandeiros tanto presentes como futuros, polo que o seu labor é clave para seguir coidando do noso medio rural.
