As Towanda Rebels falarán en Viveiro sobre a mercantilización do corpo das mulleres

Coñecidas polo vídeo viral #HolaPutero, as activistas presentarán o martes un ensaio sobre o feminismo nun acto organizado polo Observatorio da Mariña pola Igualdade

As Towanda Rebels. AXM

O Observatorio da Mariña Pola Igualdade organizou para o martes 5 de febreiro unha charla con Teresa Lozano e Zúa Méndez, as Towanda Rebels. As activistas do femismo falarán da mercantilización do corpo das mulleres no consistorio de Viveiro, ás 20.30 horas.

Towanda Rebels está a presentar o libro ‘#HolaGuerrera‘, que defende a necesidade da revolución feminista. O dúo fíxose célebre polo seu vídeo #HolaPutero, no que se dirixen aos clientes da prostitución. A peza audiovisual superou as 850.000 visualizacións en Youtube.

Towanda Rebels veñen de participar nun obradoiro de formación do profesorado denominado ‘Comunicar en Igualdade‘ impartido en Lugo, así como nun programa de educación en igualdade que se está a desenvolver no IES Politécnico de Vigo.

Tamén está previsto que visiten o CIFP Porta da Auga e o IES Dionisio Gamallo dentro das actividades do Centro de Información ás Mulleres de Ribadeo.

ACTO ABERTO

O Observatorio convida a todas as persoas interesadas a acudir a este relatorio, no que se abordarán algunhas das reivindicacións feministas do vindeiro 8 de marzo, día internacional das mulleres.

RESPOSTAR

Please enter your comment!
Please enter your name here