Os xubilados da Mariña transmiten ao BNG o seu temor “á privatización das pensións”

Os colectivos de pensionistas da bisbarra reuníronse co partido nacionalista para abordar a loita por unhas prestacións dignas

Xuntanza dos pensionistas da Mariña con representantes do BNG. AXM

A deputada do BNG no Parlamento galego, Olalla Rodil, e a coordinadora do partido nacionalista na Mariña Lucense, Ana Ermida, reuníronse con colectivos de xubilados e pensionistas da bisbarra para abordar a situación que atravesan despois de varios meses de actos reivindicativos.

Os pensionistas trasladaron aos representantes do partido nacionalista a preocupación polos “poucos avances” que se levan producido na cuestión das pensións, e o seu temor “ao intento de privatización” das mesmas “por parte das grandes corporacións financeiras que manexan os fondos de investimentos”.

REIVINDICACIÓNS

Os colectivos reunidos e mailo BNG mostráronse a prol da “derogación das reformas laborais”, a raíz das que “se precarizaron as condicións de traballo e os salarios”. Advirten, ademais, de que as pensións en Galicia “son as segundas máis baixas do Estado”.

A pensión mínima igual ao Salario Mínimo Interprofesional (SMI) e o recoñecemento da xubilación ordinaria aos 65 anos, así como a supresión do factor de sustentabilidade, son outras das reivindicacións das agrupacións de xubilados mariñás.

Concentración deste venres en Barreiros. AXM

ESTE VENRES, PROTESTA EN BARREIROS

Ao longo dos meses sucedéronse as concentracións en Foz, Barreiros, Ribadeo, Mondoñedo ou Lourenzá. Este mesmo venres houbo unha nova protesta fronte ao consistorio barreirense.

RESPOSTAR

Please enter your comment!
Please enter your name here