O Ministerio de Fomento indicou nunha resposta ao deputado de En Marea no Congreso dos Deputados, Miguel Anxo Fernán Vello, que entre xuño e setembro do pasado ano suprimíronse na liña de ancho métrico entre Ferrol e Ribadeo un total de 738 trens. Ademais, contabilizáronse un total de 144 incidencias.
Á iniciativa de control de Fernán Vello, Fomento achegou un cadro no que se recolle o número de trens suprimidos nos meses de xuño (199), xullo (169), agosto (309) e setembro (67).
O parlamentario de En Marea esixiu dotar de partidas orzamentarias para recuperar uns servizos ferroviarios “imprescindibles en comarcas como A Mariña Lucense, moi poboadas, e que teñen una importante actividade económica. Nunca entendemos a deixación absoluta que se practicou con este ferrocarril”, expuxo.
en agosto, mes de maior impacto turístico, houbo 309 cancelacións de servizos
SEN HORARIOS NOVOS PARA A BISBARRA
Na súa resposta ao deputado de En Marea, Fomento afirma que Renfe acadou un acordo coa Xunta e coas mancomunidades de municipios de Ferrolterra e Ortegal para a aplicación de novos horarios. Un acordo que excluíu á Mariña Lucense, que seguirá sen tren de proximidade.
TRINCHEIRAS
Adif resposta a Fernán Vello que “un dos puntos nos que se intensificou no últimos anos o investimento é o tratamento das trincheiras. No último trienio investíronse en Galicia 2,4 millóns nese eido”, resalta.
Engade que “está previsto continuar coa eliminación de puntos de risco en trincheiras do tramo Ferrol-Ribadeo, para o cal iniciouse pasado no mes de abril a redacción do proxecto para a estabilización dos taludes das trincheiras situadas entre os puntos quilométricos 73/950, 97/050 e 87/205, e 95/640 e 95/900, situadas entre O Barqueiro e Xove”.
SEGURIDADE
Fernán-Vello lamenta que “Adif só fala das actuacións en trincheiras” e que sinala que na planificación futura estaría a “modernización das instalacións de seguridade das Cercanías da Rede de Ancho Métrico en Galicia, eliminando o bloqueo telefónico para pasar a realizar a regulación do tráfico entre Ferrol e Ortigueira automáticamente desde o CTC”.
Non se ofrecen datas concretas, simplemente indica que “será entre 2019 e 2020”, denuncia o deputado.
VISIÓN “GLOBAL”
Segundo sinala En Marea nun comunicado, o seu deputado pedía “investimentos máis ambiciosos para rematar coas constantes cancelacións, avarías e demáis deficiencias como a renovación do parque móbil, a modernización da liña, maiores frecuencias e servizos adaptados ás necesidades dos usuarios a modo dun tren de proximidade”.
Considera Fernán Vello que é necesaria “unha visión de conxunto do mal estado da antiga Feve e apostar decididamente polo ferrocarril como medio de transporte ecolóxico e eficiente que sacaría vehículos das estradas. Hai que aprobar un Plan que inclúa toda a problemática e que ofreza un servizo óptimo para o único tren que ten A Mariña”, conclúe.
