Nova investigación en Viveiro para realizar unha fotogrametría da fragata Magdalena

Tamén se iniciarán prospeccións arqueolóxicas á procura doutros pecios da armada, como o bergantín Palomo

Fragata María Magdalena. YOUTUBE

O Equipo de Patrimonio Sumerxido para o Norte (EPASUNO) da Federación Española de Actividades Subacuáticas (FEDAS) iniciará este luns traballos arqueolóxicos na ría de Viveiro para realizar unha fase de fotogrametría e toma de imaxes en 360º do pecio da fragata Santa María Magdalena.

Tamén se iniciarán prospeccións arqueolóxicas á procura doutros pecios da armada, entre os que se atopan o bergantín de 18 canóns El Palomo, un mercante maior e unha serie de pequenas embarcacións cuxa eslora se atoparía entre os 15 e os 22 metros.

Na campaña, financiada pola FEDAS, colaborará ademais o Concello de Viveiro, a empresa Monumetría, o Seminario de Estudos Terra de Viveiro e a Armada Española.

Segundo explica a FEDAS, durante as semanas que durará a intervención arqueolóxica, a Armada enviará a Viveiro un equipo da UBUFER con base na Graña e, cando comece a frase do rastreo, reforzará os traballos dos arqueólogos cunha sonda multifaz que permitirá facer un rastreo en 3D desde a superficie aos fondos da ría. Isto permitirá ampliar a extensión da superficie a prospectar.

A investigación forma parte do Proxecto Eterna 19. Os puntos seleccionados para esta fase do plan foron seleccionados a partir dos informes británicos sobre o afundimento, a cartografía histórica e os sinais positivos que arroxou a prospección Xeofísica realizada pola empresa Argos no ano 2011, nun proxecto promovido pola Xunta de Galicia.

RUTA DA EXPEDICIÓN CÁNTABRA

Tamén Marina Viveiro e os tres clubs federados viveirenses –CAS Buceo Viveiro, CAS Costa Lugo y Mergullo Viveiro– ofrecerán apoio loxístico ao equipo de arqueólogos no seu día a día. Estes tres clubs son os que están autorizados a realizar o punto do itinerario da Ruta da Expedición Cántabra na ría de Viveiro, na que o vindeiro 1 de xuño se levará a cabo a presentación do novo pasaporte para os usuarios desta ruta, así como unha serie de actividades de promoción deste itinerario, o primeiro cultural Subacuático de Europa.

Para participar nas actividades desta xornada, os interesados débense poñer en contacto con estes clubs ou chamando despois das 19.00 horas ao teléfono 677.55.15.88.

RESPOSTAR

Please enter your comment!
Please enter your name here