O incendio dunha nave de rotulación na rúa do Plantío de Celeiro obrigou a mobilizar os servizos de emerxencias. Segundo confirmaron varias fontes ao Centro Integrado de Atención ás Emerxencias (CIAE) do 112 Galicia, no edificio non había ninguén no momento no que se espallou o lume, polo que non houbo que lamentar danos persoais.
O suceso aconteceu sobre as 14.20 horas deste martes, segundo a advertencia que recibiu o 112 Galicia. O CIAE mobilizou por precaución a Urxencias Sanitarias, e tamén a Bombeiros de Viveiro, Protección Civil de Viveiro, Policía Local, Policía Nacional e axentes das brigadas medioambientais da Consellería de Medio Rural.